shloboe boe
Bhekimpilo Tshalibe
ISIBHEDLELA seMpilo koBulawayo sivule indawo lapho okuzabe kusamukelwa njalo kuselatshwa labo abahlukuluziweyo i-One Stop Centre ngeviki ephelileyo.
Ukuvulwa kwendawo le kutsho ukuthi labo abahlukuluziweyo akusadingeki ukuthi babhode kwezinye indawo zesibhedlela kodwa sebefika endaweni eyodwa lapho abathola khona ukwelulekwa, indawo yokuhlala okwesikhatshana, ukwelatshwa, ukuvikelwa kanye losekelo lommeli kwezomthetho.
Indawo le iqakathekile nanko kubikwa ukuthi kulabomama abangu-66 abahlukuluzwa emacansini ngenyanga ezabelweni zeMatabeleland kukanti koBulawayo kulabomama abathathu abahlukuluzwa emacansini ngeviki.
UMphathintambo uMonica Mutsvangwa obengumhlonitshwa ekuvulweni okusemthethweni kwe-One-Stop Centre uncome ukuvulwa kwendawo le.
Umcimbi lo wenziwe ngesikhathi izabelo ezehlukeneyo zinanza i-16 Days of Activism Against Gender-Based Violence enanzwa umhlaba wonke jikelele kusukela mhlaka 25 Lwezi kusiya ku 10 Mpalakazi.
Umkhosi walonyaka uqhutshwa ngaphansi kwendikimba ethi: “Towards 30 years of the Beijing Declaration and Platform for Action: UNITE to end Violence Against Women and Girls”.
UMphathintambo obona ngokwenzakala koBulawayo uJudith Ncube uveze ukukhathazeka ngokwanda kwamacala okudlwengulwa kwabesifazane lamantombazana okudalwa ikakhulu yizihlobo eziseduze labomakhelwane.
“Omama abanengi bahlukuluzwa emacansini yizihlobo labomakhelwane.
“Kukanti sinanzelela ukuthi amacala amanengi awokuhlukuluzana ngokobulili kawaveli egcekeni ngoba kawabikwa emapholiseni,” kutsho uMhlonitshwa uNcube.
Uthe ukuvulwa kwendawo le kuzancedisa ukuthi labo abahlukuluziweyo benelise ukuvula amacala okuzancedisa ukuthi abantu bathole lokuncediswa ngokwelulekwa.
“Ngikhuthaza izakhamizi zakoBulawayo ukuthi zibe lesiko lokubika ukuhlukunyezwa ukwenzela ukuthi izigilamkhuba zibotshwe. Le yiyo yodwa indlela esingavikela ngayo omama lamantombazana ekuhlukuluzweni,” kutsho uMhlonitshwa Ncube.
I-One-Stop Centre le ngeyesi-18 nanko amanye asevulwe endaweni ezibalisa eGweru, Gwanda, Bindura, Masvingo, Rusape, Chinhoyi kanye le-Epworth eHarare nguHulumende kunye lenhlanganiso asebenzisana lazo.
