Sinokubonga Nkala
Nkosilathi Sibanda
NGESIKHATHI umgcinisihlalo weqembu leGwanda Pirates, uGuqukani Mpofu ekhuluma ngokuthi bazaqeda isizini bezintshantshu, kwakungathi uyawumana nje.
UMpofu kwakungathi ukhuluma ize nanko phela iqembu leli, elabunjwa ekuqaleni kwalonyaka, lazinika ukuzethemba ukuthi lizagenqula amanye amaqembu, akade azama ukuba zintshantshu zeZifa Matabeleland South Division Two kusehlula.
Ikwenzile iGwanda Pirates, ngemva kwenyanga eziyisitshiya galolunye yasungulwa. NgeSonto kubeyinjabulo ephindiweyo edolobheni leGwanda, lapho “Ezimnyama Ngenkani” ezimise khona yonke imisebenzi, zithakazelela ukuphakanyiswa kwalithimu isiya kuDivision One.
Ukuzethemba kukaMpofu lequla lakhe labakhokheli, abadlali, lomqeqetshi kubhadele mhla welanga njalo lamanye amaqembu ancintise kuligi le anikeze inhlonipho enkulu ngalimpumelelo. Kuyimvelakanci ukuthi iligi inqotshwe liqembu elitsha emncintiswaneni.
Bekungelula kuntshantshu lezi ngoba ziphumelele lapho obekulenkunzi zomdlalo ezibalisela iqembu leMawabeni, Super Strikers, Delete leBlanket. IGwanda Pires izamile, yaqinela ukubusa kungalane yamaqembu angu-11 kusukela ngomdlalo wakuqala.
Ebemabili amaqembu atshengisele ukuthi ebengayithwala inkezo yeligi le, iMawabeni leSuper Strikers. AmaSuper Yoyoyo asuke ayekethisa, ehluleka ukuyibamba ngazo zonke, okudale ukuthi ibaleke kumbango wenkezo.
Ezimnyama Ngenkani zibe yintshantshu yeZifa Matabeleland South Division Two ngemva kokunqoba iJesse Mine nge 2-0 emdlalweni obuseEgodini Stadium edolobheni leGwanda ngeSonto.
Ukunqoba lokhu, obekudingwa kakhulu, kubeke leliqembu kuligi ye-Division One ngomnyaka ozayo. Lizabika ukuthi lizadlala kuCentral Region kumbe ku-Southern Region. Ababukeli labathandi bomdlalo bagcwalise phamu inkundla kulumdlalo wokucina, okube yisitshengiselo sokuthi ukuphumelela kweGwanda Pirates bekusaziwa. UMpofu uthe bamanzi te ngenjabulo kodwa uvumile ukuthi kusaselomsebenzi phambili.
“Kumele sidlale kuZifa Central Region Division One League. Kodwa nxa sikhangela, sibona kungcono ukuthi siyedlala ku-Southern Region Division One League. Sizabona ukuthi kuzahamba njani njengoba sisacubungula imibono.
“Ngiphelelwe ngamazwi ngalokhu okwenziwe ngabadlali bethu. Ngithanda ukubonga inkokheli zethu labasekeli abaphathise ngakho konke abalakho ukuze sifike la esikhona khathesi. Ngithi bengadinwa kusasa ngoba sibadinga nsuku zonke,” kutsho umgcinisihlalo weGwanda Pirates uMpofu.
Njengeqembu elethulwe ekuqaleni komnyaka, uMpofu uthe impumela yemidlalo yabo ibamangalisile.
Umqeqetshi weGwanda Pirates uYolamu Ngwira, owake wadlalela iChrome Stars, ubikele intatheli yeZimpapers Sports Hub ukuthi uzaqhubeka elolonga njalo ekhuthaza abadlali bakhe ukuthi benze ngcono.
“Inguqu ilezigaba ezitshiyeneyo ngakho sesidlule lesi esika-Division Two, okutsho ukuba kumele sikhangele phambili. Umsebenzi ka-Division One wehlulike njalo ufuna umqondo omutsha. Abadlali kumele ngibatshele, bazwisise ukuthi isigaba esikuso sesitshintshile. Sifuna abadlali abalobungcitshi lokuzimisela kwaphezulu. Kasivaleli muntu phandle kodwa kumele siqine.
“Ngiyazi ukuthi kunzima ukuthi ujabulise wonke umuntu kodwa sicela ukuthi abalandeli bethu babekezele, baqhubeke ngothando lwabo. Kumele siqhubeke ngendlela ebesisebenza ngayo kusukela ngelanga lakuqala. Kangithembisi okunengi kodwa abantu bazazibonela bodwa ukuthi iGwanda Pirates ihloseni,” kutsho lumqeqetshi.
UNgwira uncome indlela abaligiqe ngayo ibhola, ebabaza inani lamabhola abawahlohlayo, langendlela abenelisa ukuthi bavimbe ngayo ukuhlaselwa egedini labo.
“Ukunqoba kwethu kumele sikubeke kubadlali ngoba kube yikuzimisela kwabo. Sihlohle amabhola amanengi, okuveze ukuthi besidlale silenhloso. Angithi inhloso yenguqu yikuhlohla. Sikwenzile lokho,” kutsho uNgwira.
