Sinokubonga Nkala
YiNtatheli kaMthunywa
ABANCINTISA kukhetho lweZifa olukhona ngoZibandlela bajikele amaphepha abo, kumbango okhangelelwe ukuthi ubuthanise amabizo ezikhulu ezinengi kunguqu yakuleli.
Inhlanganiso ekhangelane lokhetho lweZifa yazise ngokuthi luzaqhutshwa njani. Inkokheli zomdlalo kanobutshuzwayo zahlangana mhlaka 22 Lwezi eHarare zabopha indlela yokhetho. Ukhetho lolu luza ngemva kokuba inhlelo zenguqu kuleli bezisezandleleni zequla le-Normalisation Committee eyakhethwa yinhlanganiso ephethe umdlalo emhlabeni wonke, iFifa.
KuNtulikazi ka2023 uLincoln Mutasa wakhethwa yiFifa ukuba aphathe intambo kuze kube lokhetho ngemva kwababe khethwe phambilini ukuthi bakhokhele iZifa, uFelton Kamambo loGift Banda bahluthulelwa umbuso.
KuNtulikazi walumnyaka uMutasa, Rose Mugadza loNyasha Samanyandwe baphiwa ithuba lokuthi baqhubekele phambili kuze kuye kukhetho olulandelayo lapho iFifa ezazigeza khona izandla ithi amaZimbabwe azibuse.
Kumhlangano wenyanga eyadlulayo lapho okwapasiswa indlela yokhetho kwabekwa ukuthi mhlaka 4 Mpalakazi kuzaba lokwazisa isizwe ngokhetho kuthi 11 Mpalakazi kubelilanga lokujikela amaphepha.
Kuzakhethwa umongameli weZifa labasekeli bakhe ababili, omunye wakhona uzoba ngumuntu ongumama.
Kulandela lesibopho sika2008 eseSadc esokuthi omama labo babelesisekelo sokubusa, kulesikhundla esisodwa lapho abazancintisana bodwa.
Kuleziyisithupha lapho abanqobayo bazayahlala kuZifa Board baphathisane labomongameli ekudleni amathambo ekuthini umdlalo usiwe phambili.
Kuviki elizayo ngoLwesihlanu kukhangelelwe ukuthi abeZifa Electoral College bangahlangana, baxoxisane lofuna isikhundla ukuthi engezelele amaphepha angabe eswelekela kumzamo wayizolo.
Mhlaka 23 Mpalakazi abeZifa bazayazisa abancintisayo ngempumela yokucwayisisa amaphepha.
Mhlaka 15 Zibandlela abavunyelweyo ukuvotelwa bazakwaziswa njalo labangamalunga eZifa sebezaziswa ukuthi bazomelwa ngubani.
Sokwenziwe konke ukhetho beselusibakhona mhlaka 25 kaZibandlela.
Ababona ngezokhetho lolu bazisile ukuthi abamaqembu angene lonyaka bazakhetha labo kubuye njalo abalezikhundla kwamanye amaqembu kumbe kungatsha zomdlalo kabasoze babatshiya.
