mbulelo smpofu
Thokozile Mbedzi
ZILOKHE zitshwaqe imizimba izakhamizi zesigabeni seMagwidi eGutu.
KUBIKWA uPeter Dziro (33), uPaul Dziro (30) lo Last Dziro (31) abayizelamani, bahlasela uMaxwell Potoriro oleminyaka engu(38) kubangwa ukuba uthandana lodadewabo uTendai Dziro (26) kumbango wokuba kamlobole.
Kubikwa uPeter loPaul babenatha utshwala loMaxwell kwasekusiba lengxabano phakathi kwabo bebathathu kubangwa ukuba uthandana lodadewabo. Kubikwa njalo ukuba izelamani lezi ezimbili zaqala ukuqhuba uMaxwell zimusa ngakibo bathi sebezafika ngakibo sokusele imizi emithathu baqala ukumtshaya okwenza wahlaba umkhosi. Esizwa lokhu, omunye umfowabo wabasolwa laye weza ukuzakhangela wafica abafowabo betshaya uMaxwell ngezigodo, amampama, inqindi njalo bemkhahlela laye wabambana labo wamtshaya.
Abathathu laba kubikwa bamtshaya waze waquleka babaleka bamtshiya enjalo elele egangeni. Ngelilandelayo, uLast wasebuyela lapho ababemtshiye khona wafica uMaxwell elokhe elele lapho abamtshiya khona wasesiyabikela umkaMaxwell.
Bathwalela uMaxwell ekhaya kodwa ngokuswelakala kwenhlanhla wabhubha ntambama okwenza bayabikela amapholisa.
Isikhulumi samapholisa esabelweni seMasvingo uInspector Kudakwashe Dewa uthe kulendoda ebulawe yizelamani ezintathu zithi kungani ingathathi udadewabo athandana laye.
“UMaxwell ubelamanxeba atshona kakhulu ekhanda amabili njalo elamanxeba amanengi emzimbeni.
“Kubotshwe umsolwa wakuqala uPeter abanye bakhe ababili babaleka.
“Amapholisa acela uzulu ongabe elolwazi lwalapho okukhona abasolwa ababili laba azise amapholisa aseduzane ukuze bafinyelelwe yingalo yomthetho,” kuphetha u lnsp Dewa.
Siphakeme .Mnindwa
