mbulelo smpofu
Yintatheli kaMthunywa
IZAKHAMIZI zesiqinti seMavago eFilabusi, ziphethe imbuzo engelampendulo kulandela ‘‘ukudubuka’’ kwelinye idwala kunsuku ezedluleyo.
Kubikwa abantu bezwa umdumo omkhulu uphuma kuleli dwala emini, okwabatshiya bezibuza ukuthi kudalwe yini.
Abanye bathi mhlawumbe kwabangelwa yikutshisa kwelanga okubekhona elizweni, abanye bayakulandula lokhu, besithi kungabe kusitsho kumbe kuhlola okuthile.
Ekhuluma lentatheli omunye wezakhamizi uNkosazana Thembelihle Ndlovu uthe ekudubukeni kwedwala leli, kwaphuma amatshe.
“Liqiniso ukuthi idwala ladubuka. Ngesikhathi lidubuka kwakusemini. Kwazwakala umdumo omkhulu kakhulu sacabanga ukuthi lizulu, ikanti lidwala. Ekudubukeni kwalo kwaphuma amatshe. Akula mlilo owabonakalayo kumbe ithuntu ngesikhathi lidubuka. Kwaphuma amatshe phakathi,” kubika uNkszn Ndlovu.
Esinye isakhamuzi sibikele intatheli ukuba “ukudubuka kwedwala leli kulomutsho”.
“Idwala ukudubuka ladubuka. Ngeke sithi yikutshisa ngoba thina njengabadala besigaba, sikhangela esintwini. Idwala leli kukhona elikubikayo. Ngesinye isikhathi kuyabe kukhona okungenzakala kumbe libika okuthile. Ukudubuka kwalo akusinto encane kodwa yinto okumele ilungisiswe, abantu basukumele phezulu,” kutsho isakhamuzi lesi.
Intatheli ixhumane lomele izinyanga kuzabelo zeMatabeleland uMnumzana Mhabhinyane Ngwenya obike ukuba uwuzwile umbiko wedwala.
“Ngiwuzwile umbiko wedwala elidubukileyo. Lokho esintwini kulomutsho othile. Kuyakhuluma ukuthi kukhona okumele kulungiswe. Inkokheli zomdabu kumele ziqale ziyefika zibone, zingabona zibize abadala labamasiko, sihambe siyebona. Sizafika silungisise lapho okungaqondanga khona,” kutsho uMnu Ngwenya.
Siphakeme .Mnindwa
