mbulelo smpofu
SiloMehleli Dube
INDODA ezala mina yona engasekho emhlabeni eyasabela mhla ibizwa mhlaka 29 June 1990 yayihlezi ingixwayisa ukuthi imfundo yilifa oyongena lalo egodini ongeke waliphucwa ngomunye umuntu sibi somthakathi wezigodo.
Manengi amadoda ikakhulu kumhlubulo engiphuma kuwo ezansi yemaNdebeleni abekethisa ezifundweni bagxila kabanzi ezifuyweni, wawuzwe abanye sebegiya beklamasa bethi ubuhle bendoda zinkomo zayo.
Ngikhumbula umfokaNyambose wathi lapho indodana kaZwangendaba ethume idombo ukuthi liyemcelela umlilo watshaya wemba phansi wathi kalamntwana ozatshadiswa ngumyanga into engela nkomo ezokudla uchago ngokucela kumbe ngokuluthenga emakethi, phela esintwini indoda engafuyanga ayenziwa ndoda yalutho, yenziwa indojelana nje.
Lonyaka inengi likubonile ukuthi izifuyo ziligugu nxa izulu lisina kuluhlaza, lonyaka kuhle kwatshengisela ekuqaleni komnyaka ukuthi kuzakuba nzima ngoba izulu kalizange line okuyangaphi kwaswelakala ngitsho lekhabe, emasimini amanengi amabele atsha kuseselikhaba zahle zatshaya amahlanga loNtulikazi engakafi.
Emadlelweni utshani boma baphetshulwa ngumoya, phela isavunguzane nxa sithatha ulutho ngeke wazi ukuthi siyophosela kobani kumbe ngaphi.
Baqala ukusabalala abantu bedinga amadlelo besiyalagisa endaweni ezikhatshana lemizi yabo lakhonangale baphela utshani.
Kwaqalwa ukuthengwa isikuba kumelelwe ukuthi mhlawumbe izulu lizaphangisa lisewule kodwa phinde.
Zafa inkomo, imbuzi, obabhemi lezimvu, iganga liyanuka kugcwele amathambo ezifuyo.
Lamanzi emadamu amanengi akusela, inkomo bezibanjelwa edakeni zifuna amanzi, nxa umniniyo ethe waphuza ukuyikhupha ife lokhe imile isibulawa lilanga lokuhotsha udaka.
Lemali yokuthenga isikuba ibe isilela ngoba enengi bekuthengwa impuphu njengoba kungavunwanga lutho njalo lemali yakhona ingabonwa isehlula labasebenzayo uzwa bethi izinto azihlangani, asazi kumbe zohlangana sekutheni.
Abanye bahle babasa izibaya lamatikithi besula ngawo abanye sebabasisa ngawo umlilo.
Umdala wami uDlomo wayebahleka usulu uzwe ethi yena ongela nkomo wayengcono ngoba elendlu koBulawayo eyayilamaloja emnika imali nyanga zonke owayithenga ngemali esebenza komanisipala ngoba wayefundile ahleke athi longelankomo uyayidla inyama.
Imfundo ngumanqoba ikakhulu emaketaneni okudubeka ikuse empilweni ebutshelezi. Ayixabene.
Siphakeme .Mnindwa
