mbulelo smpofu
Bhekimpilo Tshalibe
ABALIMI abafuya inkomo zochago kuqakathekile ukuthi bathole ulwazi olujulileyo mayelana lemitshina okumele bayisebenzise.
Lokhu kukhulunywe nguMnumzana Cosmas Muzunde onguDairy Officer esabelweni seMatabeleland North othe abalimi abafuya inkomo zochago kumele beqaphele ukuthi baphethe lonke ulwazi aludingakalayo nxa befuna ukukhulisa ibhizimusi lokunakekela umhlambi wabo.
Uthe kuhle ukuthi abalimi benkomo zochago bakwazi imitshina okumele babelayo, ikakhulu le esetshenziswa nxa amathokazi ekhitshwa impondo.
“Abalimi kabahlale bephethe ulwazi njalo baludinge ngaso sonke isikhathi. Kulabo abakubhizimusi lokufuya inkomo zochago, sikhuthaza ukuthi basebenzise insimbi etshisayo nxa bekhipha impondo kumathokazi. Insimbi lezi kumele zitshiswe emlilweni njalo ekucineni kwensimbi kumele kube yisigombolozi ukuze yenele lapho okumila khona impondo, besebetshisa impondo ukuze zingaphindi zimile,” kutsho uMnu Muzunde.
“Abafuyi benkomo zochago bacetshiswa njalo ukuthi bakhuthalele ukukhipha amathokazi abo impondo ukwenzela ukuthi engalimazani njalo engalwi. Okunye njalo sikhuthaza ukuthi bezikhiphe impondo phakathi kwamaviki amathathu kusiya kunyanga ezine ngoba yikho lapho eziyabe seziqalisa ukuphuma,” kutsho uMnu Muzunde.
UMnu Muzunde uthe kuqakathekile ukuthi abafuyi balandele izixwayiso abazithola kubalimisi lakwezinye ingatsha zokulima.
“Nxa sikhuthaza ngokukhitshwa kwempondo langokusebenzisa imitshina efaneleyo, sikwenza lokhu ngenjongo yokuthi sincedise abafuyi bethu ukuthi baphakamise ibhizimusi labo. Phezulu kwalokhu, ukukhitshwa kwempondo kwenzelwa ukuthi inkomo zingalimazi muntu nxa zisengwa njalo lazo zingalimazani nxa sezisemadlelweni kumbe edibheni,” kutsho uMnu Muzunde.
Siphakeme .Mnindwa
