mbulelo smpofu
YiNtatheli kaMthunywa
IBHOLA lenyawo lonyaka lingabe seliphelile kodwa indaba zabadlali kazipheli. Zithandwa ngabalandeli.
Ngokunjalo, kubikwa iHighlanders isincenga unozinti wodumo kuPremier Soccer League (PSL) u-Ariel Sibanda ukuthi ayengeze isivumelwano sokudlalela iqembu.
Isivumelwano sikaSibanda leHighlanders siphela mhlaka 31 Mpalakazi. I-Bosso incenga unozinti lo ngesikhathi kuvumbuluka ukuthi kayisoke iphendukise umqeqetshi wabonozinti uDaniel Khumalo.
Ekuqaleni komnyaka uSibanda, oleminyaka engu-34 yokuzalwa, wayebike ukuba le kuzaba yisizini yakhe yokucina engumdlali wenguqu kodwa amahemuhemu athi unozinti lo ufunwa ngamaqembu amanengi. Kubikwa iBosso iyala ukuthi asuke eqenjini.
Kucatshangelwa ukuthi uSibanda usephiwe umsebenzi wokuqeqetsha amathimu abasakhulayo njengoba engeke abale lendawo kuqembu lakuqala ngesizini ezayo.
USibanda, ongunozinti osehlale iminyaka ekuPSL, usezakhele udumo lenhlonipho kumaqembu amanengi. Kuzwakale ukuba usekhange inqwaba yamaqembu okubalelwa kuwo iScottland, yona ehamba phambili ngokuthenga abadlali.
Iqembu leScottland libeyintshantshu yeligi yeZifa Division One, empumalanga yelizwe njalo izabe idlala kuPSL ngesizini ezayo.
Loba kunjalo, iBosso kukhanya izimisele ukugcina unozinti wayo nanko lomaqhuzu weqembu uBrian Moyo uthe basaxoxisana lomdlali.
“Siphakathi kwenkulumo ezakhayo lomdlali. Okunye elikuzwayo ngoSibanda ngamahemuhemu nje,” kutsho uMoyo.
USibanda usengunozinti weHighlanders okweminyaka edlula ilitshumi ngemva kokungena kuyo ngo-2008 engumdlali osakhulayo. Waqala ukubambela iHighlanders ngo-2009 engunozinti othenjiweyo, ngemva kokusuka kukaWashington Arubi.
Kazange adlalele enye ithimu.
Kusizini edluleyo uSibanda ubengaphiwa ithuba lokubamba egedini ngoba elimele. Abanye onozinti beHighlanders uRaphael Pitisi loReward Muza benza kuhle endaweni yakhe.
USibanda sethwala izicoco ezinengi ekuBosso ezibalisela inkezo yeChibuku Super ngo-2019, Mbada Diamonds Cup (2013), Banc ABC Super 8, EasyCall Cup lenkezo zomdlalo kazibuse ezimbalwa.
Kuzo zonke izicoco lezi, unozinti lo kwehlula ukuthi athwale eyeligi yePSL. USibanda uthe kubo bonke onozinti kuleli, uhlonipha uMunyaradzi Diya loNjabulo Ncube.
“Ngibahlonipha kubi uMunyaradzi Diya loNjabulo Ncube. Ngonozinti kuzwa labo.”
Siphakeme .Mnindwa
