Siphakeme .Mnindwa
Zintatheli zikaMthunywa
KULENINA elivela endaweni yakoMutasa eManicaland elizibulele ngemva kokubanjwa xhaka ukuthi lijola lomzukulu womkalo.
Umuyi u-Itayi Mahidhu kubikwa watholwa ngumkakhe uConstant Mapanga emkulwini eloArtwell Samaringa okwakutshengisa ukuba ababili laba bayathandana.
Indaba le ihanjiswe edale lapho uArtwell okwakuthwe abhadale US$6 000 wala okubangele ukuthi basiwe enkundleni.
Kubikwa uMapanga wayehambe emfeni esiyalala khona watshiya unkosikazi ngekhaya kodwa wasecabanga ukuphenduka esiyamkhangela wathola umzukulu wakhe elomkakhe emkulwini bencinda uluju lwemvelo. Wafika wathatha izigqoko zikamzukulu wahamba lazo emalilweni ethi uzaphenduka sebekhuluma udaba lwakhona kodwa ekuseni wathola umkakhe esezibulele.
“Ngezwa ngisiba lolaka, ngathatha impahla zikamzukulu ngahamba lazo emfeni. Ngithe ngiphenduka ngathola umama engekho ngamdinga kanti usezibulele eduze khonapho. Unkosikazi wami kukhanya kumehlule ukuba amelane lendaba zakhe,” kubika uMnu Mapanga.
UMapanga wezwa kakhulu ubuhlungu lapho uArtwell esithi abantwana abazalwa ngumuyi ngabakhe kodwa wala ukuba sebelesikhathi bethandana wathi baqale ngesikhathi uMapanga eyemfeni. UArtwell wavuma ukuba wabanjwa elele logogo wakhe.
“Ngiyavuma ukuthi ngabanjwa ngilele laye kodwa ayisimi engenze ukuba azibulale, uzithathele yedwa isinqumo sakhe. Ngiyazisola kakhulu ngokulala lonkosikazi kakhulu wami,” kubika uArtwell.
UArtwell kwathiwa abhadale US$6 000 ngoba kuthiwa nguye obangele ukufa kukagogo wakhe, kodwa yena wala, okwenza bahambisa udaba lolu enduneni.
“Wathi ngimbhadale US$6 000 sokungani ngilobola umkakhe ofileyo mina ngala, yikho silapha lamuhla, hatshi lokho akutshoyo ngabantwana. Wahamba wayangazisa kwabozala ukuthi yimi esengingumkhwenyana wabo. Obabazala laba sebefuna imali leyo kimi kodwa mina angikwanisi ukuyibhadala. Bangihambisa lasemapholiseni, amapholisa angikhulula ngoba kungayisimi imbangela yokufa kwakhe,” kulandisa uArtwell.
Induna uMutasa itshengise ukuphelelwa ngokwenziwa ngu-Artwell, owatshengisa ukungahloniphi njalo wayangisa lemuli yangakibo.
“Izenzo zakho zitshengisa ukungahloniphi ngitsho udelele usiko lokulobolana. Ukulala lonkosikazi kakhulu wakho akuvunyelwa njalo ukulala lomuntu endlini yokuphekela, ehlala ukudla njalo lapho okwenzelwa khona isintu lokhu kungezelela ukuyangisa,” kutsho induna uMutasa.
UArtwell kuthiwe abhadale inkomo ezihlanu kusiyafika u31 Mbimbitho kuwonalo umnyaka.
Inhlawulo le ime kanje, eyodwa ngekakhulu eyokumdelela, enye ngeyokungcolisa umkulu, enye ngeyokulala lesihlobo sakhe, enye ngeyokwehluleka ukuthatha amanyathelo afunakalayo nxa kuvikelwa ingozi.
Induna iveze ukuba kumele kwenziwe i-DNA test ukuze kwaziwe ukuba abantwana ngabakabani.
