mbulelo smpofu
Ethel Ncube
INHLANGANISO yeHlango Ranch egxile ekufuyeni inkomo zohlobo lwamaBrahman amhlophe isiveze ukuba kuqakathekile ukugcina amarekhodi enkomo.
Umnikazi wenkampani yeHlango Ranch uMnumzana Jairos Mahlangu uveze ukuba amarekhodi enkomo ayancedisa umlimi ukuthi abe lolwazi olubanzi ngenkomo zakhe.
Ekhuluma lentatheli uMnu Mahlangu ubike ukuba kubalulekile ukugcina amarekhodi ezifuyo zakho.
“Nxa ufuya inkomo, zingabe zizinlutshwane kumbe zizinengi, kumele ubhale phansi ukuthi inkomo le izelwe nini njalo ileminyaka emingaki.
“Amarekhodi la ayanceda nxa suthe wacabanga ukuba uthengise inkomo yakho. Lo othengayo kuyenzeka ukuba abe lemibuzo kumbe njalo acele ukubona lapho okubhalwe khona ngenkomo ayithengayo,” kulandisa uMnu Mahlangu.
Uqhubekele phambili esithi imbali ngesifuyo osithengayo ibalulekile ngoba iyancedisa lalo othengayo kubhizimusi lakhe lokufuya lokuqhelisa isibaya sakhe.
“Nxa ethenga kuHlango Ranch inkomo siyakupha imbali yenkomo oyithengayo ukuthi yehlisa amalitha ochago anganani.
“Othengayo uyatshengiswa futhi lapho okubhalwe khona ngenkomo ayithengayo ukuba ezizala inkomo le yiziphi azibone njalo abekwazi ukuthi inkomo ayithengayo ileminyaka emingaki.
“Nxa ungazange ubhale phansi uba lohlupho ukuba uchasise ngembali yenkomo yakho,” kubika uMahlangu.
Ubuye waveza ukuba abalimi abaqakathekise ukuba babhale phansi ulwazi lonke olufunakalayo ngezifuyo.
“Balimi asizameni ukuba sibhale konke okuqakathekileyo ngenkomo zethu sibe zazi kodwa kubekhona okubhalwe phansi ngazo.
“Akumelanga ufanisele ngezifuyo zakho kodwa ubelolwazi olugcweleyo olubhalwe phansi ukuze kusincedise kusasa,” kuphetha uMahlangu.
shloboe boe
