Online Reporter
Abel Ndooka
CHIKWATA chenyika checricket chemaChevrons chichasangana necheIreland mumitambo minomwe inoti mumwechete weTest Match Series, mitatu yeOne Day International neimwe mitatu yeTwenty20 International Series.
Mitambo yezvikwata zviviri izvi ichatanga mwedzi unotevera apo wekutanga weTest Match uchatambirwa kunhandare yeQueens Sports Club kuBulawayo uye mimwe yese yeODI neT20 ichizotambirwa kuHarare Sports Club.
Mutambo uyu unotevera wemaChevrons neAfghanistan uyo uchangopera apo zvikwata izvi zvakabandana mumitambo yeT20 neODI neTest Match iyo maChevrons akakundwa yese.
Mutambo wekutanga weTest Match wemaChevrons neIreland unotarisirwa kutanga musi wa6 Kukadzi uchizopera musi wa10 Kukadzi. Nerimwe divi, mitambo yeODI ichatambwa mazuva anoti 14, 16 na18 Kukadzi kuchiti yeT20 ichazotambwa musi wa22, 23 na25 Kukadzi.
Achitaura pamusoro pekuuya kweIreland kuzosangana nemaChevrons, managing director weZimbabwe Cricket – Givemore Makoni – anoti sangano ravo rakagadzirira kugamuchira Ireland uye mutambo uyu wakakosha zvichitevera kupera kwakaita weAfghanistan.
“Tine mufaro mukuru takamirira kugamuchira Ireland kuzotamba mutambo uyo uchange wakakura uye uchanakidza zvikuru.
“Kuronga mitambo miviri mikuru yakatevedzana mucherechedzo wakasimba wekuti takazvipira kusimudzira mutambo uyu uye kupa vatambi vedu mikana yekutamba mhando yecricket yapamusoro,” anodaro Makoni.
MaChevrons neIreland zvakapedzisira kusangana gore radarika mumutambo weTest Match uyo wakatambirwa kuIreland uye wakaona ichihwina ne4 wickets.
