Abel Ndooka
Abel Ndooka
KAPUTENI wemaWarriors – Marvelous Nakamba – akadzoka muchikwata cheLuton Town ndokutamba maminitsi 65 apo chakakundwa 2-1 neSwansea City musi weSvondo.
Nakamba ange ave nemitambo yakawanda achingogara pabhenji asingatambe kuchikwata chaRob Edwards icho mwaka uno chiri kutatarika muEnglish Championship zvichitevera kuburitswa kwachakaitwa muPremier League mwaka wadarika.
Pakatanga mwaka uno, Nakamba akatanga asingatambe sezvo ainge akakuvara asi kuzodzoka kwaakaita kuchikwata ichi, kwaona mutambi uyu achitamba mitambo 12 kubva pa24 yatambwa neLuton Town muEPL.
Luton Town yakatamba zvekare musi wa1 Ndira apo yakasangana neNorwich City mumutambo wakatambirwa kuKenilworth Road musha weLuton Town.
Nerimwe divi, mutambi wemaWarriors nePlymouth Argyle – Brendan Galloway – akatamba maminitsi 68 apo chikwata chake chakarakashwa 2-0 necheOxford United nemusi weSvondo zvekare.
Uyu ndiwo wakave mutambo wekupedzisira kurairidzwa naWayne Rooney sezvo zvichitevera kukundwa kwakaitwa chikwata chake chePlymouth, akabva adzingwa basa mazuva aitevera. Galloway atamba mitambo 10 kubva pa23 yatambwa nePlymouth mwaka uno uye chikwata chake ndicho chakasenga chiri pasi pelogo reEnglish Championship chine zvibodzwa 18 chete kubva pamitambo 23.
KuItaly, Jordan Zemura akatamba maminitsi 71 apo chikwata chake cheUdinese chakaita mangange 2-2 necheTorino mumutambo weSerie A.
Udinese parizvino yakagara pechipfumbamwe palogo reSerie A iine zvibodzwa 24 kubva pamitambo 18.
Iri kutevera kumashure kwezvikwata zvinoti AC Milan, Bologna neJuventus zvekuti ikakwanisa kuramba ichitamba nhabvu inonwisa mvura ichihwina mitambo yayo inogona kupedza iri pazvinzvimbo zvekupinda mumitambo yemuEurope mwaka unotevera.
Kubva pamitambo 18 yatambwa neUdinese parizvino, Zemura akwanisa kutamba 16 ndokunwisa kamwechete.
