Sinokubonga Nkala
Shingai Dhlamini
IMIDLALO yeMzilikazi District Pool Association ifinyelele emaphethelweni ngempelaviki lapho okunqobe khona iqembu leFast Cash.
IFast Cash iphiwe umvuzo wayo emcimbini wemiklomelo oqhutshelwe ePatapata Sports Bar, eMpopoma koBulawayo.
Ngomnyaka odluleyo i-PS Classics yaba yintshantshu, kwathi i-Fast Cash yayisendaweni yesithupha kungalane yamaqembu. Iqembu leMnethi elidabuka elokitshini leNkulumane 5 liqede kunombolo yesibili kuthi iBlack Sharks yeEntumbane ibe ngeyesithathu.
Unobhala jikelele weFast Cash Pool Club uQhelisumuzi Dube uthe njengeqembu kukhulu abakutholileyo kulumnyaka.
“Njenge-Fast Cash, sizuze okukhulu kulumnyaka, sinqobe kabili kumqhudelwano weMombe Tournament. Okumqoka kube yikuqeda sizintshantshu ze-pool esiqintini seMzilikazi.
“Kuyimpumelelo enkulu kithi njalo sijabule kakhulu. Siyaziqhenya ngalokho okuzuzwe ngabadlali ikakhulukazi abasebancane,” kutsho uDube.
UDube uthe kunhloso yabo lonyaka njengeqembu, ukuqeqetsha abadlali abancane lokubagcina bengekho emgwaqeni kuyinto ebajabulisayo.
“Yebo besilabadlali abasakhulayo abathokozisayo ababalisa lokaputeni wethu uBrainess Ndlovu onguye obengumdlali owedlule bonke kuligi yeMzilikazi District kusigaba sama-singles.
“Silaye futhi uBrandon Tazviregwi laye ohluphe kakhulu kusigaba esifanayo. Omunye nguGift ‘MaYellow’ Nleya owaphumelela ukuya kumncintiswano weBlack Label eHarare,” kutsho uDube.
UDube uthe sebeyilindele ngabomvu imidlalo yePremiership.
“Okulandelayo yikukhangelela lokulungiselela iPremier League, engaphansi kweBulawayo Pool Association.
“Akula badlali esingathi siyabafuna okwakhathesi njalo kulokho angeke sitsho amagama athile ngoba silabo abadlali abasakhulayo.
UDube uthe iqembu kumele lizilolonge futhi lilungiselele okulandelayo, ngomnyaka ozayo.
“Ngikhuthaza abanye bami ukuthi babhekise amakhanda phansi, bazilolonge ngokuzikhandla, bagcine ukubambana okukhona.”
