
Bhekimpilo Tshalibe
UGATSHA olubona ngezomhlabathi, ezokulima, amanzi kanye lokuthuthukiswa kwemaphandleni soluxwayise abalimi ukuthi baqaphele izilimo zabo emasimini, zingaphanjaniswa yimihogoyi.
USikhwicamfundo uObert Jiri ongunobhala jikelele kugatsha lolu uveze ukuthi abalimi kumele bananzelele imihogoyi emasimini abo ngoba isiqalile ukumemetheka kwezinye izabelo ezifana leMashonanland East.
“Samukela umbiko wokuba imihogoyi iqalise ukuhlupha emasimini nyakenye sokusondela amalanga eKhisimusi kodwa khathesi isisabalele ilizwe lonke.
“Njengoba izulu lisina amaqanda emihogoyi ayakhukhulwa lizulu,” kutsho uProff Jiri.
Uqhubekele phambili wathi ukhuthaza abalimi ukuthi bevuke nsukuzonke besiyakhangela izilimo zabo emasimini.
“Thina njengoHulumende silemithi yokubulala imihogoyi ngakho sikhuthaza abalimi ukuthi bevuke nsukuzonke besiyakhangela izilimo zabo emasimini (scouting), bengathola ukuthi imihogoyi isiqalisile ukudla emasimini basibikele ngokuphangisa ukuze senelise ukuyilwiswa ingakamemetheki.
“Loba izulu lisina sikhuthaza abalimi ukuthi bengayekeli ukuyakhangela emasimini,” kutsho uSikhwicamfundo uJiri.
Uthe ukhuthaza abalimi ukuthi basebenzise imithi eyiyo efanele ukubulala imihogoyi ukuze bengaphambanisi izilimo zabo.
“Sikhuthaza abalimi ukuthi bengasebenzisi izinto ezinjengabo safa, itshukela eliyi-brown, isawudo nxa befuna ukubulala imihogoyi ngoba sebengaphambanisa izilimo zabo ngokufaka into lezo. Sikhuthaza abalimi ukuthi bezame ukudinga imithi eqondileyo esetshenziswa nxa kubulawa imihogoyi,” kuphetha uSikhwicamfundo Jiri.