![](https://566448.40t4n.group/wp-content/uploads/2025/01/uTulange-Mudenda.jpg)
Innocent Kurira
UBATSHIYE basala bekhamisile uTulange Mudenda kumjaho omkhulu oweBulawayo Athletics Board (Bab) Cross Country Championship kuhlandla labesifazane.
Umncintiswano lo ubuseNketa Drive Park, eMpopoma.
UMudenda, oleminyaka elitshumi lasithupha yokuzalwa, unqobe kumango we-6KM ngemizuzwana eyi-23:26.61.
Inhloso yakhe bekuyikuthola isikhathi esiyimizuzu eyi-24 ukuze azibekisele indawo emqhudelwaneni wezabelo ozakuba seHarare ngenyanga ezayo.
“Ngijabule kakhulu ngendlela engigjime ngayo. Bengigxile ekuqinisekiseni indawo yami yomqhudelwano wezabelo. Ngiyajabula futhi ukuthi ngenelise ukwenza engangikuhlosile. Ukunqoba lokhu kutshengisa ukuthi ngincintise ngokuzikhandla. Ngibonga usekelo engiluthole kubaqeqetshi kanye lengilolonga labo,” kutsho uMudenda.
Endaweni yesibili bekunguConcern Ngwenya, oweBinga, oqede ngemizuzwana eyi-27:25.00. Kulandele uNozipho Dube kweyesithathu ngemizuzwana eyi-30:26.38.
Emjahweni wabafana owe-8km, uShelton Ncube unqobe ngesikhathi esiyimizuzwana eyi-26:44.80. UTaunga Maseka ubengowesibili ngemizuzwana eyi-28:48.89, uPhakamile Ndlovu ubengowesithathu nge-28:50.20 imizuzwana.
Umgcinisihlalo weBab, uWatson Madanyika ekhuluma ngempumelelo yalumncintiswano uthe:
“Kuyasithokozisa ukuthi izinga lokuncintisana kuCross Country Championship liyaqansa. Sibone ukuzinikela okumangalisayo kulabo abancintisileyo. Imijaho efana lalo ibalulekile ekukhuliseni ithalenta lentsha njalo ibanika inkundla yokutshengisa amathalenta abo. Kodwa, kulesidingo esiphuthumayo sokuthi sikhuthaze abesifazane ukuthi baphatheke emidlalweni yethu. Kumele sisebenze ukuqinisekisa ukuthi isibalo sabesifazana siyanda.”
Kumango we-10KM, kugijime owesifazana oyedwa, uLesedi Nkomo oqede ngemizuzwana eyi-47.13.94. UFreedom Banda unqobe umjaho wabesilisa abadala ku-10km ngemizuzwana eyi-33.58.39.
U-Andrew Ndlovu loBonani Moyo baqede endaweni yesibili kanye leyesithathu ngokulandelana kwabo.
UNdlovu ubelemizuzwana eyi-34.13.20 kwathi uMoyo wawela entanjeni imizuzwana eyi-34.15.72.