Sinokubonga Nkala
Bhekimpilo Tshalibe
KULENDODA eleminyaka engu-20 egwetshelwe ukuyapika iminyaka engu-15 ejele ngumthethwandaba weBeitbridge ngeviki edluleyo ngemva kokutholakala ilecala lokudlwengula umntwana oleminyaka emithathu.
Ngokutsho kweNational Prosecuting Authority of Zimbabwe kukhasi labo ku X, kubikwa mhlaka 16 Mfumfu kuwonalo umnyaka, umama womntwana watshiya umamangala loyise owayezilalele endlini yokulala yena esiya esigayweni. Kuzwakale ukuthi umamangala wayezidlalela lomfowabo umsolwa wasefika wabathatha bobabili wahamba labo lapho ahlala khona.
Kubikwa umsolwa wanika umntwana omdala iR50 wathi kayethenga iziwiji wasala edlwengula umamangala. Umfowabo kamamangala uthe ephenduka wathola umsolwa edlwengula udadewabo. Umsolwa kubikwa wethusela umfana lo ethi angatsheli muntu ngalokhu ayekubonile.
Kuzwakale ukuthi unina kamamangala wathi ephenduka esigayweni wathola umamangala ekhala, wathi embuza ukuthi ukhalelani umamangala wamlandisela ukuthi kuhambe njani. Unina kamamangala wabikela amapholisa okwenze umsolwa wabotshwa.
Kusenjalo kulendoda egwetshelwe ukuyapika iminyaka engu-5 ejele ngumthethwandaba weBeitbridge ngemva kokutholakala ilecala lokuzama ukubulala.
Kubikwa mhlaka 8 Mfumfu kuwonalo umnyaka uTrymore Mbengo (22) waxabana lomngane wakhe oyintombazane ngo 0300hrs besendlini eDulibudzimu. Kuzwakale ukuthi umamangala wazama ukubamba umsolwa owakhipha ingqamu wamgwaza esifubeni esandleni senxele umamangala wasewela phansi.
Kubikwa umsolwa wazama ukubaleka kodwa wabanjwa yizakhamizi zamhambisa emapholiseni.
I-National Prosecuting Authority of Zimbabwe ikhuthaza uzulu ukuthi ekele udlame njalo bexazulule kuhle indaba zabo.
“I-NPAZ ikhuthaza uzulu ukuthi ekele ubudlwangudlwangu njalo bexazulule indaba zabo ngokukhulumisana kuhle kumbe bedinge owesithathu ozabancedisa ukuxazulula udaba lwabo,” kuphetha i-NPAZ.
shloboe boe
