Sinokubonga Nkala
Bhekimpilo Tshalibe
INGCITSHI kwezokufuya sezixwayise abalimi abagcina inkomo zochago ngendlela abangazilandela nxa befuna ukuphusisa amathole ukumunya.
UMnumzana Cosmas Muzunde ongu-Dairy Officer esabelweni seMatabeleland North ukhuthaze abalimi abafuye inkomo zochago ngendlela zokuphusisa amathole lamathokazi ngoba amathokazi kuyiwo aveza ukuthi ibhizimusi yakho yochago iyangaphi.
“Nxa amathokazi eselamaviki amathathu sikhuthaza abalimi ukuthi baqalise ukuwapha utshani obulutshwana njalo nxa amathole selenyanga ezintathu sebengawapha izilimo njalo bawekele entshise,” kutsho uMnu Muzunde.
Uqhubekele phambili esithi nxa amathole esefikisile inyanga ezintathu sebengalungiselela ukuwaphusisa.
“Nxa amathole eselenyanga ezintathu sebengawekela emunye okwesikhathi esifitshane babe sebewapha ukudla okuqinileyo bebe lokhu bekungezelela amathole aze eyekele ukumunya.
“Okunye njalo ngesikhathi sokuphusisa amathole sikhuthaza abalimi ukuthi bawanike ukudla okulenhlamvu ezincinyane (grain) ukungezelela ukudla,” kutsho uMnu Muzunde.
Uthe amathokazi kawafuni kuhlaliswa lapho okumanzi khona.
Uthe abalimi kumele babone ukuthi ezibayeni zamathokazi kuhlala komile njalo kuhlanzekile njengoba amathokazi engenelisi ukujayela ukutshintsha komumo womkhathi.
“Izibaya zamathokazi kumele zivikele emqandweni, ekutshiseni kanje lasebumanzini ukwenzela ukuthi amathokazi engahlaselwa yimikhuhlane.
“Izibaya zamathokazi kumele zingenise umoya njalo kumele zibe ngezivikela amathokazi ukuthi engadliwa ngamaganyane,” kuphetha uMnu Muzunde.
