mbulelo smpofu
Brandon Moyo
Asikhohlwa la esiphuma khona!
Lokhu yikho okungabe kukhulunywa zinkokheli labadlali beqembu leMawabeni FC, selibike ukuba lizadlala imidlalo yalo yekhaya enkundleni yeMawabeni Grounds laseHabane eSigodini.
Iqembu leli lizaqabuka ukudlala kuligi ka-Division One.
Umgcinisihlalo waleliqembu uMpumelelo “Mbesuma” Nkomazana ukubikele iZimpapers Sports Hub kuliviki ukuthi babhalise inkundla yeHabane Esigodini leyabo iMawabeni Grounds ekhangelelwe ukulungisiswa kumaviki ambalwa azayo.
UNkomazana uthe kumalanga alandelayo bazaqala ukulungisisa inkundla yabo ukuze balolonge kuyo, bayijwayele, kungabi lula ukuthi banqotshwe kuyo. Inkundla le babeyisebenzisa kuligi yeZifa seMatabeleland South Division.
“Njengoba siqala ukulungiselela uDivision One, sabhalisa indawo ezimbili njengenkundla yethu esiyithandayo. Kusobala ukuthi sifuna ukuyidlala yonke imidlalo yethu yasekhaya lapha eMawabeni kodwa siphinde safaka iHabane Stadium njengeyinye inkundla yethu yasekhaya.
“Sifuna ukuqala ukulungisiswa iMawabeni Grounds. Sifuna ukubiyela inkundla yonke, silungise phakathi, sakhe lezindlu zokutshintshela amathimu. Sizame ukuthi inkundla yethu ifinyelele kuzinga elifunekayo,” kutsho uNkomazana.
Iqembu leMawabeni FC likhuphukele ku-Division One ngemva kokuqeda likundawo yesibili kusigaba seZifa Matabeleland South Division Two. Liqede lingelesibili, lilandela iGwanda Pirates, zehlukaniswe ngemiklomelo amabili kuphela.
IMawabeni FC esungulwe ngo-2019 izimisele ukulandela ezinyathelweni zeStars United ephuma kulindawo, eyayidlala ku-Division One ngeminyama yama-1990s.
Kumizamo yokuqinisa iqembu labo phambi kokuba kuqale isizini, kuqhutshwe imidlalo yama-trials ngempelaviki lapho okukhethwe abadlali abatsha abalitshumi lasithupha.
Amalungiselelo okulolonga la akhokhelwe ngumqeqetshi uJohannes “Tshisa” Ngodzo, umqeqetshi weMawabeni FC uNkosi Moyo, Morris Mukwiti loNhlanhla Mtshinda Moyo.
Kusenjalo, kubikwa kuzaqhutshwa umqhudelwano ozadibanisa iMawabeni, Gwanda Pirates, Nust le-Eagle Life FC, kulungiselelwa ukuqala kwesizini.
Abadlali beMawabeni FC abakhethiweyo:
Thabo Simela (rightback), Priviledge Ncube (rightwing), Singabenkosi Sibanda (leftback), Abiola Zhou (centreback), Promise Fuzane (leftback), Ronald Maridzo (defending midfielder), Tyrone Jerot (goalkeeper), Kingdom Moyo (attacking midfielder), Thabiso Masoha (leftback), Ronald Moyo (right wing), Future Mabhena (goalkeeper), Bonginkosi Dube (rightwing), Muzingaye Mahlangu (centreback), Prince Ngondo (defensive midfielder), Lwakhiwe Mpofu (striker)
shloboe boe
