
Thokozile Mbedzi
KULAMANINA amabili atholakale elezidakamizwa ezibalisa i-15kg zembanje, lamambodlela angu-80 eNgoma kwenye i-roadblock emgwaqweni osuka eMasvingo usiya eBeitbridge.
Amanina la, uRangarirai Jimu oleminyaka yokuzalwa engu-26 weMbuyamaswa, ngaphansi kwenduna uNhema eZaka kunye loMagret Mutsawashe Mafara oleminyaka engu-34 yokuzalwa, weHoughton Park, Harare babotshelwe icala lokutholakala belezidakamizwe ngeviki ephelileyo.
Kuzwakale ukuba ababili laba ababesiya eHarare bamiswa ngamapholisa bahlolwa lapho andubana kutholakale belezidakamizwa ezigoqela i-15kg yembanje, amambodlela omuthi wokukhwehlela angu-35 ama-100ml eBenylin lamanye angu-45 ama-100ml eBronclear.
Isikhulumi samapholisa esabelweni seMasvingo uInspector Kudakwashe Dhewa uthe amapholisa abophe ababili laba ngenxa yosizo lomphakathi.
“Amapholisa eZimbabwe Republic Police aqhubekela phambili ebonga amalunga omphakathi ngokupha ulwazi oluqotho olwenza benelise ukubopha izigangi.
“Siyaqhubeka sinxusa uzulu ukuthi abike loba yiziphi izenzo zobugangi endaweni yabo. Nxa bengasincweba indlebe siyabathembisa ukuthi lololwazi luzakuba yimfihlo njalo ngeke baziwe,” kutsho uInsp Dhewa.
Kusenjalo, kulendoda yePlumtree eyabanjwa ilezihlahla zembanje ezingu-29 egwetshwe ukuyapika inyanga ezingu-12.
Umsolwa uFreddy Mpofu kazange achithe isikhathi senkundla kodwa uhle wavuma ukuthi ubelima imbanje ukuze enelise ukondla abantwana.
Umtshutshisi uSelestine Madziwa uveze ukuba abomthetho bathola udletshana lokuthi ulima imbanje okuyikho okwabangela ukuthi abotshwe.
Kubikwa mhlaka 17 kuyonale inyanga amapholisa athola udletshana lokuba uMpofu ulime imbanje.
Lakanye bahamba besiyaphenyisisa bathola izihlahla engu-29 esivandeni sakhe bahle bambopha.
Umsolwa utshele umantshi ukuba yena icala lakhe uyalivuma kodwa wayezilima ngoba efuna ukuba agcine abantwana.