
YiNtatheli kaMthunywa
ABADALA bathi impi yomdeni kayingenwa kodwa-ke, ngendlela amalunga enye imuli yakoMoyo, eMbembeswana esigabeni seBubi, eMatabeleland North alwa ngayo, angeke kube yindaba ekhulunywa ngudlu.
Imuli le iphakathi kwesindabaphenduli esingadinga ukuthi ixazululwe emphakathini. Lokhu kuza ngemva kwesehlakalo sokufa kwamalunga amabili alimuli okucatshangelwa ukuthi afakelwa itshefu emputshini.
Ngokutsho kwamanye amalunga emuli axoxisane lentatheli kunakanelwa ukuba kulokungazwani phakathi kwamalunga emuli le, okusuke kwavela obala ngokufakwa kwetshefu ekudleni okudale ukuthi kufe uNkosikazi Sinothando Gwayi obeleminyaka engu-52 yokuzalwa lomzukulu wakhe uPrimrose Ndlovu (13).
Amanye amalunga, uSanelisiwe Ndlovu (14) oyindodana kamuyi loPrecious Ndlovu (3) ababelalisiwe esibhedlela sebakhitshwa njalo bangekhaya.
Indaba le isisabalale enkundleni zokuxhumana ezinengi, njalo isemilonyeni yabantu ngoba iletha usizi lokungahlaliseki.
Kulabafakazi abangamalunga emuli abaqina ngokuthi itshefu eyabulala ababili yafakwa emputshini kukanti kulemibiko ethi ukufa kwamalunga emuli le kwabangelwa yikudla amakhowa.
Kubikwa ngoLwesithathu ngeviki edluleyo imuli yakoMoyo le, yayithe gwaqa egumeni.
Kucatshangelwa ukuba kulomntwana owathunywa ukuthi ayephosela “umuthi” phakathi kwegabha lempuphu, kuhloswe ukuthi itshefu le ibulale imuli yonke.
Saphekwa isitshwala, saphakululwa kwadliwa njengansuku zonke. Kuvele ukuba isitshwala esifanayo saphiwa inja yahle yafa, okuyikho okwethusa abantu.
Ngemva kwesikhatshana bonke baqala ukukhala ngezisu.
Bagijinyiselwa ekilinika yeMbembeswana, andubana bedluliselwe eMpilo Central Hospital.
Elinye ilunga lemuli le elale ukuqanjwa ngebizo liveze ukuthi inkulumo eziphuma kuWhatsApp zingamanga ngoba izihlobo zalo zabulawa yitshefu, hatshi ngamakhowa.
“Silusizi ngokutshona kwesihlobo sethu lomzukulu. Bebehlala eMbembeswana koMakoni. Kusile ababili abantwana njalo omunye omncinyane sephumile esibhedlela.
“Ilunga lemuli yethu lomzukulu sibabekile. Osele esibhedlela ngumntwana oyedwa. Kulomuntu owabafakela ekudleni ekhaya, hatshi ukuthi babesemasimini,” kutsho elinye ilunga lemuli elingafunanga ukuqanjwa ngoba lisesaba.
Amanye amalunga ayakuphika lokhu, bathe ukufa kudalwe ngomunye wabo obanga “amandla” edlozi emulini.
Udaba lolu lwabikelwa amapholisa eNyathi. Ngesikhathi intatheli idinga umbiko wamapholisa, umakhelekhukhwini wesikhulumi samapholisa eMatabeleland North, u-Inspector Glory Banda ubengangeni.