shloboe boe
SOKUNGUMPALAKAZI, selisondele ikhefu leKhisimusi, abanye bahle baqala ukulijabulela lenyanga iqalisa, ngamawoso lotshwala indawana zonke lezi.
Loba zikhwelile izinto ayiswelakali eyokuzijabulisa, khona kuqakathekile ukujabula labanye umuntu ake alibale ngokumkhathazayo okwesikhatshana. Kodwa phela ikhefu leli libuya lezinengi ezizatshiya abanye sebebambe izihlathi imicabango sigijima ekhanda umuntu esesithi amadlozi akhe amfulathele ikanti hatshi.
Umuntu uphuma endlini ehlose ukuya emsebenzini, uyabe ezithwalele okuyimadlana kwakhe okwanele imbodlela eyodwa yotshwala yokuqandisa umphimbo, esazi ukuthi ingakafiki lakungxenye bakhona abayabe sebebhuza njengempukane. Bunjalo phela utshwala nxa sobuphandla indoda, iyabe isilunywa, sokusithi ithengele wonke umuntu utshwala ebhawa, akhohlwe ukuthi utshiye abantwana endlini abalinde imali yezibiliboco zeKhisimusi.
Bobaba nanzelelani, qaphelani, uZibandlela ebuya izikolo ziyavulwa, abantwana bafuna amayunifomu, lamabhuku, lendleko zesikolo ziyafuneka. Iyavela ngaphi imali usuyitshaphazile. Lungiselela ikusasa lakho lemuli yakho ngebhonasi oyitholileyo.
Izikolo lazo zivaliwe abantwana besikolo bayaphumula izingwalo bake bajabule njengoba kulikhefu. Yebo ukujabula akwalelwa kodwa kasijabuleni okulomkhawulo ngoba lisengabantwana besikolo. Ukuziphatha kubalulekile kakhulu ngesikhathi lesi sekhefu ngoba yikho okukupha isithunzi empilweni.
Kambe impilo yakho yonakale ngenxa yekhefu leli nje kuphela? Elenyanga eyodwa zwi.
Akhona amantombazana acina eseyimikhaza kwabesilisa befuna ukukholisa bethengelwa lokhu lalokhuyana. Ngeke udle imali yomuntu angatholi lutho. Yikho okucina kubangela ukuthi abanye bacine belinyazwa kumbe behlukuluzwa ngoba bebhadalela imali abayidlileyo. Isisu singathi nama, umkhuhlane nama, impilo kudala yonakele ngendaba zokukholisa. Uzawubika kubani lowomthwalo ozawuvuma, inengi labobaba labo balemizi yabo, wena udingwa umuntu sedakiwe sokutshaywa ivosho kuphela.
Asiqapheleni uMpalakazi Mthwakazi, singahlali minyaka yonke sikhala ngomkhuhlane ngodubo ngenyanga kaZibandlela, kazithengwe khathesi impahla zabantwana zesikolo, ngoba luyazula uhelwane emabhawa lapha umuntu uyavuka esesaba ukuya endlini, imali usuyiphephuluze yonke?
