mbulelo smpofu
Innocent Kurira
I-HIGHLANDERS isiqale amalungiselelo ayo ngaphambi kokuqala kwesizini ilethemba elivuselelweyo, njengoba umqeqetshi uKelvin Kaindu efuna ukwakha kakutsha iqembu elilamandla okuqeda isomiso seminyaka engu-18 sokuswela inkezo yePremier League.
Uhlelo lokuqeqetsha ngaphambi kwesizini seluhamba phambili, iqembu ligxile ekwakheni ukubekezela lokuqina kwabadlali. Ngokutsho kukaKaindu, izinga lokuqina kweqembu yilo elihamba phambili.
“Inhloso yethu enkulu kulolu hlelo lokulolongela isizini yikuhlola ukuba abadlali bakusimo esihle njalo baphile kakuhle ngokwengqondo kanye lokubumbana kweqembu. Mayelana ngokuqina kwabadlali lokuvikela ukulimala sibe lohlelo ngesikhathi isizini ivaliwe, obelulandelwa ngumuntu wonke eqenjini.
Kumalanga akuqala wokulolonga, sizakhangela ukuthi yibaphi abadlali abenze okufaneleyo, sihlole njalo ukuqina kwabo,” kutsho uKaindu.
Uthe uzimisele ukwakha kakutsha, njengoba kulehlekana labadlali elifulathele iqembu ngesikhathi sekhefu. Abadlali laba nguPeter Muduhwa, Godfrey Makaruse, Lynoth Chikuhwa loMarvellous Chigumira, asebethulwe kuqembu eliqabuka iPremier League eleScottland.
“Senza konke okusemandleni ethu ukuthi sithole abazavala izikhala. Silethemba lokuthi sizabeka isisekelo esiqinileyo kuqembu lakusizini. Angeke kube lula kodwa sizathembela kulumsebenzi,” nguKaindu lo.
Ubukhokheli beqembu bubike ukuba buzamsekela umqeqetshi, osekusele yikuthi enze umsebenzi wakhe. Ngaphandle kokusuka kwabadlali, inkokheli zeBosso zithe sezilobe izivumelwano labanye abadlali abakuluhlu lukaKaindu.
Njengoba iqembu lilungiselela isizini entsha, libhekane lomsebenzi onzima wokuqeda isomiso seminyaka engu-18, lingathwali inkezo yePSL.
Ukuqala kukaKaindu kuqembu leHighlanders kwaku ngomnyaka ka-2012 lapho akhokhela khona iqembu leli ukuthi linqobe imidlalo engamatshumi amabili lantathu linganqotshwanga, wacina ehlulwe yiDynamos ngemiklomelo yamabhola ahloliweyo.
Utshiye iqembu ngesizini ka-2014, waphindela kulo ngo-2024 lapho aqede umnyaka eqeqetshe iHighlanders yavala isizini ikunombolo yesithupha kungalane yamaqembu kuPSL.
Kusenjalo, inhlanganiso yePremier Soccer League (PSL) ikhangelelwe ukuthi ibelomhlangano wayo womnyaka ngenyanga ezayo, andubana kuvulwe inkundla zomdlalo ngoMbimbitho. Inengi lamaqembu seliqalile ukuthenga abadlali, kulungiselelwa isizini entsha.
Umdlalo wokwandulela isizini, owe-Castle Challenge Cup uzabe uphakathi kweDynamos leSimba Bhora.
shloboe boe
