shloboe boe
Thokozile Mbedzi
ZlLOKHE zitshwaqe umzimba izakhamizi zendaweni yamabhizimusi yeLevel Cross eMakambe eChikombedzi ngemva kokuba enye indoda ibuze enye ngesenzo sayo sokuhlukuluza abantu okubangele ukuthi itshaywe ngenduku ekhanda ize ife.
Kubikwa amadoda amabili angabangane, uMheke Khoza (66) lomunye okungasatholakalanga ibizo lakhe azithezela olulenkume kulandela ukubuza uDaniel Chifamba (32) olomkhuhlane wengqondo ukuthi kungani elodlakela ebantwini okuyikho okwabangela ukuthi amtshaye ngenduku aze afe angathi ubulala inyoka ngeSonto kuyonale iviki.
Kubikwa uDaniel wazama ukuhluthunela umngane kaKhoza induku ayelayo kodwa wala layo waseyihluthuna wamtshaya ngayo kanye ekhanda. UKhoza walaya umngane wakhe ukuthi abaleke kodwa lokhu akuzange kumphathe uDaniel wahle wamphendukela wamtshaya ngenduku leyo ekhanda ephinda-phinda okwabangela ukuthi aze awele esamendeni sezitolo waze wafa.
Ebona ukuthi usefile wathatha umakhalekhukhwini wakhe kunye lebhasikili wadliwa ngumswenya.
Abantu ababesezitolo bathi besondela bananzelela ukuthi uKhoza usedlule babikela amapholisa lezihlobo zikaKhoza.
Isikhulumi samapholisa esabelweni seMasvingo uAssistant Inspector Masawuso Patinyu uthe amapholisa aphuthume abopha umetheswacala.
“Umetheswacala usesezandleni zamapholisa, isidumbu sikaKhoza sithwalele esibhedlela ukuze siyehlolwa njalo ikhanda belisesimeni esibi kakhulu.
“Uzulu uxwayiswa ukuba axwayane lomkhuba wokuxazulula ingxabano ngodlame, kababikele amapholisa labaphathi bezigaba,” kuphetha uInsp Patinyu.
