shloboe boe
EMNYAKENI odluleyo emhlubulweni weMatabeleland South kwathi sekutshise okwamagama njalo lezulu seliphuzile ukusewula wawusizwa lapho ohamba khona kungaba sezimfeni kumbe emabhasini ingoma ibinye kukhulunywa ngokuphuza kwezulu lokufa kwezifuyo.
Ingwevu lamakhehla zadideka zaswela impendulo ngoba zisithi kazikaze ziwubone umnyaka onje.
Induna yabiza abantu bayo kwakhethwa uLwesithathu lweviki yinye ngayinye ukuthi kuzabe kuguqwa phansi ngedolo kucelwa kuMvelinqangi ukuthi anise izulu nanku lamadamu amanengi besokugcwele udaka kuphela.
Kwabekwa lomthetho wokuthi abayakhulekela izulu kumele kube ngabantu asebekhulile, kwanxuswa labafundisi bamabandla atshiyeneyo labaphurofethi lezinyanga.
Kwakhulekwa amaviki amathathu elandelana kodwa phinde ukuthi limise kumbe litshaye phansi, ukutshisa kwengezeleleka lenkomo zafa ngamandla.
Kwezwakala elinye ikhehla eselimpunga lisithi abantu abahambe embuthanweni wokukhulekela izulu kukhona phakathi kwabo abathwele imigcozo engalunganga, lokho wayekuphawula ngoba ethi endulo bona bebethi bangahamba ukuyacela izulu befika emakhaya ntambama lalihle lilale liwohloka kujabule inyamazana, kujabule abantu ngoba amanzi eyimpilo.
Baqala ukusolana abantu kuthiwa abanye bahambe ukuyakhulekela izulu bedakiwe, abanye njalo kwakucatshangelwa ukuthi abazilanga ezocansi njengokutshiwoyo nxa uzavuka usiyacela izulu, pho-ke ngubani owayezayibangula indaba le.
Kwacina sekulwiwa abantu sebekhombana ngeminwe abanye besola abaphurofethi abanye besola abafundisi bethi abasibo abaqotho kwaze kwayafika lenduneni.
Induna yagweba labo okwakucatshangelwa ukuthi yibo abalokudelela kwathi sokukhethwe iqula labantu asebekhulile lezalukazi ezingasayi emfuleni bahamba ukuyakhulekela izulu kodwa phinde kwathi ngemva kwesikhathi abanengi sebedelile lathululeka izulu ngezwa sebekhala njalo abantu bethi selisina ukusa kwamalanga abasela lesikhathi sokulima ngazibuza ukuthi umuntu ufunani sibili.
Ayixabene.
