shloboe boe
UKHUPHUKILE wayendele kundodana kaDlamini wayezibule ngentombazana iselanywa ngenye indodakazi besekulandela indodana yona-ke yayibizwa ngesitemo sakoDlamini kwakuthiwa nguMlangeni loba nje wayesesemncinyane.
Phela lokhu babesenzela ukukhulisa umdeni njalo loyise wayesekwazi kamhlophe ukuthi loba engadlula emhlabeni usetshiyile inhlanyelo ezasala iqhelisa umdeni njalo ngosiko lwabo wayesekhona ozakuma emakhanda aphathe intonga nxa besemandlinzeni.
Bahlala ngokujabula ngelinye ilanga beziphumulele lomkakhe wambuza ukuthi kambe engaba lokhe esafuna abanye abantwana bengezelele isibalo wanyikinya ikhanda ekhomba sobala ukuthi kahambisani lalowo mcabango.
Ngelinye ilanga behlezi kwafika uyise omncane ezobazisa ukuthi kuzakuba lomthethelo ngoba kukhona okwakungahambi kuhle emdenini wakoDlamini, wadidizelela ukuthi ngalelo langa kuzafuneka abalesibongo sakoDlamini kuphela ukwenzela ukuthi amadlozi aphange abemukele.
Ngomthethelo wakuqala izinto azihambanga kuhle, kwathiwa idlozi lizondile njalo nxa kungaphangiswanga kwalungisiswa kungavela kumbe kwenzakale isiga esizaphica abadala. Kwayiwa emhlahlo sabona isanuse sona esibona lokusemakhazeni sakuveza ukuthi sokumile intanga yamakhomane phakathi kwentanga zamajodo etsho ngamazwi ahlakaniphileyo ukuthi kulomntwana wakoDlamini ongeke aphathe imikhonto lenduku zakoDlamini.
Bazama obabakazi ukuthi babhule umlilo bethi ezalelwe esibayeni ngeyakho, kwathi ukhulu walapha ekhaya wahle wakhomba umalukazana indlela kanye lendodana leyo okwakuthiwa akusiyo yakoDlamini, laye uKhuphukile kazange aphikise wenza njalo ngoba esebona ukuthi seliwuchithile umuthi inkonyane.
Omunye umngane wakhe ababesonta bonke wezwakala ethi okulempondo akufihlwa emgodleni, kambe wayethi kuzaphetha ngani ngoba bekuzikhanyela ukuthi yindlubu ewele ephokweni.
