Siphakeme .Mnindwa
EMINYAKENI embalwa edluleyo lapho okwaqala ukuntengantenga komnotho welizwe lakithi baphuma abantwana beZimbabwe bafulathela abadala labatsha besiyadinga amadlelo aluhlaza kwamanye amazwe.
Abanye baya kuboNgilandi, kuboMelika abanye njalo kuboGoli.
Ukubala yikuzenzela, ngangizwe abanye besithi akula lizwe elingela muntu weZimbabwe umhlaba wonke jikelele, inengi ngizwa bethi ligcwele eGoli ngoba mhlawumbe siseduze lalo ikakhulu ngapha emhlubulweni wemaNdebeleni.
Bathi lemisebenzi iyatholakala kodwa ngokubona kwami iGoli ayisafani layizolo. Ngoba ngathi ngivakatshele omunye umngane wami ngabona abantu abambalwa engibaziyo befolele ukudla kwamahala okuphiwa abaswelayo kwahle kwangicacela ukuthi yizo impawu ezikhomba ukuthi izinto zijikile.
Thina ngapha ekhaya siyabe simelele ukuthunyezelwa sisithi umuntu uyasebenza kanti udla lamanqe.
Banengi abasuka ekhaya lapha bethathwa ludumo lweGoli bafice ukuthi amagceke aluhlaza akade bewacabangela asephenduke ugwadula abanye bacina bengena emisebenzini emibi efanana lokubamba inkunzi, ukugqekeza emabhanga lokuthathela imota ezithwala imali lempahla.
Lezinsuku bayadubula amapholisa eGoli, ngikhuluma nje kulomunye ubaba umntanakhe ubetshintsha izimota ethumela buthumuthumu omalayitsha betshintshana, kulabomalayitsha bempahla kuphinde kube lowayebuya lemali, ukuthi umntanakhe wayesebenza msebenzi bani kazange athande ukubakwazi.
Wayethi nxa esebuxhaphile eseklamasa eqolotsha okwenkonyane yensengwakazi elele isidla ikhaba emasimini abantu, uzwe ethi ngidlani okubabayo ngaphandle kwebilebile engizifakela lona. Kungensuku ngaki kwafika umbiko wokuthi indodana yakhe idutshulwe eGoli yahle yafela khonapho, kade itshontsha.
Banengi abazali abazifica besesimeni esinje. Asizameni ukubuzisisa ukuthi abantwabethu basebenza ukwenzani ngoba sezizinengi izidumbu esengizibonile njalo ziyaphuza ukubuya ekhaya kusalungiswa amaphepha omufi kutshiye imuli ingela ngitsho lendibilitshi sekuthengiswa ombuzi labonkomo kubhadalwa indleko zokuthwala umufi esuka eGoli.
Ayixabene.
