Phos’ elakho. . .UMlimu kakhalalelwa . . .!

NGOMNYAKA ophelileyo ngenxa yokutshisa obekukhona kumagumbi wonke womane elizweni lakithi inengi labantu babengaselalo ithemba lokuthi izulu liyaphinda line, nanku phela lesikhathi sokusewula kwalo okuvame ukuba ngoMpandula sasesidlule kwaze kweqa.

Konakala yonke into kubangelwa yisikhudumezi, izibholane zacima amanzi, amadamu atsha. Lapho ohamba khona wawungahlangana lomuntu ekhuluma yedwa esithi ukutshisa lokhu okunje kudlula okwesihogweni, eGehena lapho okuzabaselwa izoni zitshe qhu zibe ngumlotha.

Izifuyo zafa ngobunengi zibulawa yindlala langumhawu wokuswela amanzi. Kwaphunywa amajumo besiyathandazela izulu abantu kodwa phinde. Kwezinye indawo baqala ukubuthana ngoLwesithathu munye ngamunye kusukela kunyanga kaNcwabakazi kodwa phinde lisewule.

Bathe sebebona ukuthi isikhathi sesihambile nanku phela lesikhathi sokusewula kwalo sesidlule kulokhu kutshisa likhipha imikhovu etsheni badela, balahlela amathawulo phansi bama ukuthandazela izulu.

Abantu basebezwakala bethi lonyaka kuzacuba lathi abantu. Bekukhala osedolobheni, kuhlabe umkhosi osemaphandleni ngoba engazi ukuthi izifuyo uzaziphani. Abanye bezwakala besithi abalimi lonyaka ngoba akula zulu sebehle bazenza ingilosi ezithunywe lababona ngomumo womkhathi imitshina yabo ungathi yayisiphandliwe ngoba isikhathi esinengi ababekukhuluma ngomumo womkhathi kwakungahambelani.

Ekuqaleni kukaMpalakazi laqala ukuwohloka endaweni ezinengi lana okwamagama labana abangazange bazihluphe ngokulungiselela ukulima bethi akula zulu baqala ukuba matasatasa sebedinga inhlanyelo yona ekade ingabonwa lonyaka ikakhulu kulabo abayidinge sebekholwe ngokubona njengoTomasi.

Intengo yayo layo yayisikhuphukile. Abanengi behlulekile ukulima loba lilokhu lisina umhlaba usumuhle usugqoke ingubo eluhlaza.

Lokhu okwalonyaka kufundise abantu abanengi ukuthi thina abantu silokuhlela kwethu kodwa uMdali, uMvelinqangi wenza izinto ngesikhathi njalo usiphendula imikhuleko yethu ngesikhathi abona kufanele.

Thina sisuka sithi singaba lenkinga sijahe impendulo yemikhuleko sibone angani isiphuzile sicine sikhalala kanti sizokhela amalahle ekhanda.

Kukho konke esifuna uMdali asenzele khona asihlabeni phansi ngedolo sithandaze njalonje, sibekezele kwelinye ilanga uzasiphendula ngoba yena unguMdali wezulu lomhlaba esiphila kuwo.
Ayixabene.

Related Posts

Amanina amathathu abotshelwe ukudlwengula indoda (20)

KULENDODA yeMazowe eleminyaka yokuzalwa engu-20 okubikwa ibanjwe inkunzi, yadlwengulwa ngamanina amathathu, okubikwa ngaweHarare Abasolwa laba—uDiana Sibanda (35), Brendy Msipa (35), loTabeth Harris (33)—amiswe emthethwandaba ngoLwesibili esetheswa umlandu wokubamba inkunzi kanye…

Kucatshangelwa itshefu emputshini kusifa ababili

YiNtatheli kaMthunywa ABADALA bathi impi yomdeni kayingenwa kodwa-ke, ngendlela amalunga enye imuli yakoMoyo, eMbembeswana esigabeni seBubi, eMatabeleland North alwa ngayo, angeke kube yindaba ekhulunywa ngudlu. Imuli le iphakathi kwesindabaphenduli esingadinga…

Leave a Reply

Your email address will not be published. Required fields are marked *

You Missed

SADC to intensify DRC peace efforts

SADC to intensify DRC peace efforts

‘Sadc a staunch advocate for DRC peace’

‘Sadc a staunch advocate for DRC peace’

AI art: Friend or foe? . .Local artists weigh in on the creative revolution

AI art: Friend or foe? . .Local artists weigh in on the creative revolution

Against the odds. . .Woman, maid share breast cancer survival story

Against the odds. . .Woman, maid share breast cancer survival story