
Innocent Kurira
AMALUNGA eHighlanders asezavotela iziphathamandla zeqembu kukhetho olulodwa, kulandela ukuguqulwa kwesisekelo sombuso. Kubikwa kuzaqala ngomnyaka ka-2027.
Lokhu kuvezwe emphakathini ngeSonto ngesikhathi amalunga eBosso ebuthene emhlanganweni womnyaka, eClubhouse. Amalunga avumelane ukuthi aguqula iziqephu thile zesisekeko sombuso ukuze iqembu likhokhelwe ngendlela esilandelwa ngamaqembu wonke emhlabeni.
Umsebenzi wokuguqula isisekelo sombuso lesi kade waqalisa. Okunye okubalulekileyo, okubekwe kakutsha kubalisa ukuhlonitshwa kwehofisi kamaqhuzu njengomuntu okhokhela iqula le-executive. Lokhu kutsho ukuthi umaqhuzu kasoke abelane umsebenzi lonobhala, njengalokho okwasenzakala eminyakeni edluleyo.
Olunye utshintsho kube yikubizwa kakutsha kwezikhundla. Unobhala usezabizwa ngokuthi- executive member for marketing, umgcinisikhwama (executive member for finance), ngokunjalo ilunga lekhomithi (member for technical development).
Okukhulu kukho konke kube yikuguqula indlela okukhethwa ngayo inkokheli. Eminyakeni edluleyo, umgcinisihlalo, unobhala lelunga lekhomithi bebevotelwa bodwa kuthi umgcinisikhwama lomsekeli kamgcinisihlalo bebekhethwa ngomnyaka otshiyeneyo.
Kubikwa, kulandelwa isisekelo sombuso esitsha, amalunga enkokheli la, azabusa okweminyaka eminye. Kuvunyelwane lokuthi lo ozafuna ukuba ngumgcinisihlalo weqembu abengumuntu ohlala kuleli.
Unobhala weHighlanders uMorgen Dube uthe: “Ukuguqulwa kwesisekelo sombuso kuphelile njalo sekulandelwa. Kusukela khathesi, yikho osekukhona.
“Sekumele sibone ukuthi kuyenzeka konke lokhu. Okumqoka yikutshintshwa kwezikhundla lokubizwa kwazo.”