Siphakeme .Mnindwa
Liberty Mutamba
UMQHUDELWANO kanobhutshuzwayo oweMorgan Foundation uzavuthisa inkundla yePhelandaba Stadium, edolobheni leGwanda ngempelaviki.
Amaqembu amane akhangelelwe ukuthi abange inkezo le yi-Ajax Hotspurs FC (Bulawayo), Jordan FC (Filabusi), Gwanda Pirates leSuperstrikers ezaseGwanda.
Inkezo le isekelwa nguMorgan Milton Nare, ovela eGwanda ophinda abengumqeqetshi wenguqu eSouth Africa.
UNare uthe uletha umncintiswano wenkezo le eGwanda kuphakamisa ithalenta eliseGwanda kuphinde kunikeze abadlali abasakhulayo igunya lokuncintisa ukuze bazitshengisele kweminye imidlalo.
“Imidlalo yenkezo yethu izakubakhona ngoMgqibelo, mhlaka 11 Zibandlela ePhelandaba Stadium eGwanda. Amaqembu amane anxusiweyo asekubeke mgceke ukuthi azabuya. Njengomuntu okhulele eGwanda, ngifisa ukuthuthukisa abadlali bakulumango njalo lokubambanisa amaqembu anjenge Ajax le Jordan yikuthi sitshengise ukuba enkundleni kulokubambana njalo nxa sithuthuka, sithuthuke sonke,” kutsho uNare.
Ubike ukuthi selesikhathi efisa ukuba umncintiswano ofana lalo wenzeke ngakho ke iphupho lakhe lizafezeka.
“Inkezo le sengileminyaka ngilokothela ukubona isisondela kuyangijabulisa ngoba ngifisa ukuba sithuthuke njalo sibone abadlali beqinile. Amaqembu enguqu la asencedise abasakhulayo ngokuba khipha ezitaladeni, ebavikela kuzidakamizwa okuyinto enhle.”
UNare olechence lokuqeqetsha ele-Caf le-Diploma yeSport and Recreation Management uthe obengumdlali omkhulu uKudakwashe Mahachi uzabe ekhona kulumqhudelwano.
“Sinxuse umdlali ohlonitshwayo kunguqu uKudakwashe Mahachi ukuthi abengumhlonitshwa kulumncintiswano. Sifuna ukuthi abadlali bathole intshukuntshu lenkuthazo yokuthi labo badlale beqinile.
‘Inkezo le ngeyakuqala lapha eGwanda sifisa ukuba idlondlobale ukuze abantu emaJahundeni bathole labo unanzo ikakhulu kwezemidlalo,” kutsho uNare.
Abalandeli benguqu edolobheni leGwanda lakwezinye indawo sebeqalile ukunathisa itiye ngalumqhudelwano. Unompembe olesizotha uNkosana Nduna nguye ozatshaya impembe kumidlalo le ngokutsho kwabaqoqi bomncintiswano.
Umdlalo ukhangelelwe ukuqala ekuseni ngehola letshumi 10 lapho iSuperstrikers ezadibana khona leJordan FC besekulandela iGwanda Pirates le-Ajax.
