Siphakeme .Mnindwa
Ethel Ncube
KULENDODA yePlumtree emiswe emthethwandaba ngeviki ephelileyo isetheswa icala lokudlwengula umfundi wesikolo owayecatshele izulu.
UVusumuzi Ncube oleminyaka engu-25 yokuzalwa uzaphindela edale lemthethwandaba kuyonale iviki esesiyathola isigwebo sakhe kulandela ukudala kwakhe icala lokudlwengula.
Umtshutshisi uSelestine Madziwa ubike ukuba umsolwa wadlwengula umntwana wesikolo.
“Mhlaka 16 kunyanga kaLwezi kumnyaka osanda kuphela abafundi ababili, omkhulu wayeleminyaka eng-14, bacela ukucatshela izulu kumsolwa. Umsolwa wavuma wabapha indlu ukuba babebecatshe khona.
Uthe kunjalo wahamba endlini leyo wafika wadlwengula umfundi oleminyaka engu-14 kanye engazivikelanga waqeda wabethusela. Abantwana bathula baze bakhuluma ngoMpalakazi,” kubika uMadziwa.
UMantshi uJoshua Nembaware uthe umsolwa uzaphindela emthethwandaba ezothola isigwebo sakhe kuyonale iviki.
Kusenjalo amapholisa akoBulawayo adinga inina elibelethe usane layamlahla egangeni eduzane leDelta Beverages. Umamangala ubike ukuba ngesikhathi etheza inkuni wezwa umntwana ekhala wasondela wathola umntwana egoqelwe ngebhulugwe kukhanya ukuba usanda kubelethwa. Ugijime wayabikela amapholisa wona abize i-ambulensi yathwalela umntwana esibhedlela seMpilo.
Intatheli ixhumane lobambele isikhulumi samapholisa koBulawayo uAssistant Inspector Nomalanga Msebele obike ukuba indaba injalo yenzakele.
“Kulosane oludojwe egangeni, unina womntwana uyadingwa, kaziwa. Umntwana uphephile esibhedlela seMpilo. Sikhuthaza intsha ukuba ingakenzi isinqumo esingaqondanga baqale bakhulumisane labadala, kumbe abantu ababathembayo. Siyakhuthaza njalo ukuba abazali nxa umntwana esehlelwe luhlupho limsekele ukuze senqabele ingozi efana lale.
