mbulelo smpofu
Siqhubeka ngogwalo lwethu esitshiye khona esigabeni kuphithizelwa abantu bethakazelela usuku lweKhisimusi. Kusephakathi nje kokuphithizela abantu bekholisa kwenzeka isimanga kuthutsha abantu abagola abatsha, amajaha kanye lezintombi okukhanya kuyinto eyethusa abanengi kanti njalo labanye bathithibala ngelithi kanti kwasekutheni pho.
Baqala besazila zila abafana lamantombazana yakhwaza ingqwele eyiyo eyayibabuthelela yatsho ingathikazi ngelithi nxa kuyikuthi abatsha laba abezwa ulimi alukhulumayo wayesazakhuluma labo-ke ngolimi lwaseRussia.
Pho ulimi lwaseRussia lona lwaluvele lululimi bani. Babengabuzanga elangeni abantwana babantu, yakhala yaqaqamba insimbi yeRussia, akekho loyedwa kwabatsha laba owabuza komunye ukuthi kwakusenzakalani. Kwaphaphatheka lezalukazi zikaMlimu zingazi lapho okwakumele ziqonde khona. Insimbi yeRussia yayingaphikiswa njalo ingaphikiseki.
Umthimba lo omutsha owawusubuthelelwe esigabeni saseMapate wawusungomunye umthimba ongaselani lomkhosi weKhisimusi. Yabuya njalo ingqwele yakhwaza ngelithi iKhisimusi le babeyiqalele kwelaseRhodesia, babezayiqedisa elizweni leBotswana.
Kwasekuyinsuma nsumane yendaba-ke leyo. Kwasekutheni bevele bezahamba njani pho. Amajaha eganga asuka angena evinkilini lapho athenga khona okunathwayo kodwa bengakaze bathenge baqala bendlala udaba lwabo lwabasobala lakuMakhonjwa indoda yomlungu eyayithengisa evinkilini lapha.
Injongo emqoka kwakuyikulwela umhlabathi wabansundu ababewuthathelwe ngeganyavu kanti njalo akukho okunye ababekuphethe ngaphandle kohlamvu lombhobho. Amajaha eganga lawa ayelesibindi esimangalisayo, besuka lapho batshiya bebhale incwadi bebhalela isitha sabo ngelithi bona basebethethe okungokwabo njalo nxa ibutho labamhlophe lilesifiso sokulandela bakwenze lokhu besazi ukuthi abafana bomhlabathi babalindile phambili ngale.
Bathi nje befulathela bengakaze bafike ngaphi uMakhombela wahle walutshaya ucingo etshayela enkambeni yamapholisa ukuthi abafana babelapha sebebuthe intsha yonke. Lapho yavele yasuka yahlala inkamba zamapholisa zakhupha amapholisa ngokuphazima kwelihlo ukuze bayevimba abafana laba bengakaze bafike kude. Sinanzelela inhlakanipho yabafana beganga laba, kabasuki bonke kanye kanye, abanye basala emuva belindile ukuthi kuyini okuthatha indawo. Labaphambili labo bahamba bethiya omaquphula ukuze imota zamapholisa zingenelisi ukuyafika kulabana abasele emuva. Lapha sinanzelela umoya wokubambana oqakathekileyo ngempela ukuze abantu bavikeleke njalo basinde.
shloboe boe
