Siphakeme .Mnindwa
Usuphange waqala umnyaka. Yasuka yahlala bakwethu. Umnyaka omutsha uza lezawo. Ilanga liphuma lendaba litshone lezindaba zalo.
Umbuzo okhona kithi njengabafundi ngothi uyaphetha umuntu ezithuthukisile kumbe uyaphetha umuntu ekhe phansi umganu ukhona?
Kambe yiziphi izenzo ezingakhokhelela ukungaphumeleli kwabafundi? Kambe yikuphi okungenziwa ngabafundi ukuze baphethe umnyaka wabo bephethe okubukekayo?
Le yimibuzo eqonde ukuhluzisisa izinqumo ezithathwa ngumfundi ngamunye ngamunye ikakhulu sigxile kulaba abazahlalela imihloliso yokugqiba izigaba ezithile ekufundeni. Kunengi okungenziwa bafundi.
Asihlolisiseni okulandelayo.
1. Lisendlini yokufundela. Umbalisi unqolonga amabizo abafundi ababanga umsindo ngethuba lokufunda lokubala. Laba bafundi sebehlule kuzigaba zonke nje. Abakhuzeki. Bathanda ukuphambanisa ababalisi nxa befundisa.
Lokhu ngokunye kwezinto eziletha ukwehluleka kwabafundi kumiphumela yabo ekufundeni, ekupheleni komnyaka. Umsindo ngezikhathi zokufunda kanye lokuphambanisa ababalisi akufanelanga kwenziwe ngumfundi lonyaka.
Uwa phansi uyelahlwa le mfundi. Asekeleni ukuxokozela sibanga umsindo ngezikhathi zokufunda. Umfundi lomfundi kenze lesisinqumo sokuba kungaphambaniswa muntu ekufundeni.
2. Umbalisi unqolonga amabizo abafundi abangalethanga umsebenzi akade ebaphe wona ukuba bayewuloba ngekhaya.
Bakhona ababuye bengawenzanga njalo abanye abambalwa baziwa njengeziqoqodo ekuletheni imisebenzi.
Lokhu bafundi ngokunye okudala ukuba imiphumela ibemibi ekupheleni komnyaka.
Kuhle ukuba umfundi ngamunye enze imisebenzi ayiphiwa esikolo ukuba ayenze endlini yokufundela kanye lale ayiphiwa ukuba ayeyenza ngekhaya.
Ukungalobi imisebenzi ngokunye okuwise inengi laphuma lihambele elikamabuyaze emihlolisweni.
Izinqumo zethu zalo umnyaka azibekwe obala ukuba yonke imisebenzi yesikolo izakwenziwa kungela ukubambeka ngokunengi emakhaya kanye lakuviyo.
Akulamsebenzi ngitsho lowodwa ozakuwela phansi, sibi semihloliso layo izalotshwa ukuze kuthi nxa sesisekulotshweni kwemihloliso yokugqiba isigaba umthwalo ubelula.
Kunengi okufanele kukhangelwe kuhlelwe ngabafundi ekuqaleni komnyaka kunje. Nxa lezizinqumo lezinye zingalandelwa, abafundi bangakhuphula izinga lokuphumelela ekufundeni kwabo. Asihlale phansi — ke mfundi sihlele ezinye zezinqumo esifisa ukuzilandela lonyaka.
Singalibali ukuba ukuhlela lezo zinqumo kungelakuzilandela kuyize leze. Kudinga sisebenze nzima ekuzilandeleni.
