
Salibonani bafundi. Ngithemba liqhuba kuhle ezifundweni zenu njalo lenza kuhle. Lamhla sizakhangela izinto ezidala izingxabano ebantwini, okwenza kucine kungaselakuhlalisana kuhle. Kuleli iviki sizagxila kakhulu kunhlalo yemadolobheni. Sikhumbule bafundi ukuba amaNdebele ngabantu abathanda ukuhlalisana ngoxolo ngakho akukhwabitheki ukubona abantu bengahlalanga kuhle lanxa nje imihlobo isixubene kungasafani lakudala.
Asazi, mhlawumbe ukuxubana lokhu yikho osekudale ukungahlalisani kuhle kwabantu. Zinengi ke izinto ezenza abantu bangahlalisani kahle emadolobheni. Okokuqala okumele sikunanzelele yikuthi amaguma esihlala kuwo emadolobheni mancane njalo izindlu zethu zisondelelene azifani lasemakhaya. Lokhu kwenza ukuthi konke esikwenzayo ezindlini kumbe emagumeni angakithi kube lomthelela othile kubomakhelwane. Into esixabanise abantu abanengi ngumsindo odalwa yiziginci. Intanga yenu liyathanda umsindo weziginci kakhulukazi.
Uthole umuntu esivulele phezulu isiginci sikhala kuze kunyikinyeke amafastela akomakhelwane angathi angadabuka athi phakla. Abanye benu bathi bekhuzwa kunjalo bephulele izigodo endleleni babe yizacuthe. Lokhu ke sekudale izingxabano ezinengi kakhulu. Asikunanzeleleni bafundi ukuthi thina singabe siwuthanda umsindo kodwa omakhelwane bewuzonda. Kuhle ukuthi uvule isiginci sakho sibe lomsindo olingeneyo ukuze ungakhubi omakhelwane. Okunye njalo okudala ingxabano emakhaya yikuthi abanye abentanga yenu sebephendule imigwaqo yaba zinkundla zenguqu. Kunjalo nje kudlalelwa phambi kwamaguma abantu.
Ibhola leli elilithandayo kwesinye isikhathi lisuka lidale umonakala omkhulu kakhulu. Aphelile amafastela ezindlu zabomakhelwane kanye lawezimota ngenxa yebhola leli elidlalelwa emigwaqweni. Lokhu sokudale ingxabano enkulu kakhulu emakhaya lapha. Wena madlala ibhola uyabe usuthezele abazali bakho olulenkume ngoba phela sekungadingeka ukuthi balibhadale lelo fasitela. Kuhle ke bafundi ukuthi senqabele ububi lobu ngokudlalela ibhola lapho okufanele khona. Kwamanye amalokitshi usomadolobho walungisela abantu izinkundla zokudlala inguqu abantu bezilibazisa.
Asizisebenziseni lezo zindawo. Enye inkemenkeme yendaba idalwa yizifuyo esizithandayo esizifuyileyo emakhaya. Izinja labomangoye kufuyiwe emakhaya ethu amanengi.
Umbuzo okhona ngothi kambe sizigcine kuhle yini izifuyo zethu. Azisuki zone zibe yisinengiso kubomakhelwane. Ukuze izifuyo lezi zigcineke kahle emakhaya yikuthi zihlale zivalelwe hatshi ukuba zekelwe zibe ngumhlambi kazelusile nje zizule indawo yonke.
Nxa zingekelwa zizule zisuka zidale umonakalo omkhulu, ezinye ziyangena ezivandeni zabantu zone kakhulukazi kanti futhi phela izifuyo azikhethi ukuthi zenzela ngaphi ingcekeza, zihamba nje zingcolisa yonke indawo. Lokhu kusuka kudale ingxabano enkulu kakhulu njalo kucine kungasela kuhlalisana kuhle.
Ngokunjalo-ke, umuntu ofuyileyo kagcine kuhle izifuyo zakhe ukuze zingabi yisilingo kwabanye abantu.
Zinengi izinto ezingadala ingxabano kodwa isiqokoqela yikuthi kumele kube lesisombuluko abantu bahlalisane ngoxolo kanye lokuthula. Sizaqhubeka sikhangela ukuthi singakhulumisana njani nxa kube lokungezwani ukuze kuhlaliswane kuhle. Asihlanganeni ngeviki ezayo.