Siphakeme .Mnindwa
Sikumbuzo Dabengwa
Umumo womkhathi ulakho ukuguquka kulandela ukuna kwezulu ezindaweni esiphila kizo. Kuqakathekile ukuba umfundi munye ngamunye azi njalo aqaphelise umumo womkhathi okhona..Asikhangeleni amagama alandelayo, asetshenziswa nxa umkhathi ukusimo esithile.
- Imvimbi
Lapha kusuke kukhulunywa ngomumo womkhathi olezulu elina kokuphela lingelakho ukusa. Lingasa kodwa liphange liphenduke.
Lilakho ukuna lichophelela, okuyikuba liyabe lithonta kancinyane kancinyane. Lilakho ukuna okwamalanga amabili elandelana kumbe okweviki livimbile njengokutsho kwebizo lalo. Leli lizulu elandise ukuletha umdaka phansi ngoba lina okungenisa amanzi kancane kancane phansi kungelakujaha.
Liyavala livimbe, imisebenzi emasimini iyama. Abahlakulayo bayema. Abakofolayo labo ngokunjalo bayema. Ukhula luyanda kungangeneki emasimini. Ozama ukuhlakula angasiphuna kuphela ngenxa yodaka oluyabe selukhona ngenxa yemvimbi.
- Isiqhotho
Lo ngumumo womkhathi lapho izulu elina ngolaka mhlawumbe ligcugcisa. Lapha sitsho ukuba izulu leli lina lilomoya odiliza izinto ezithile. Lingathatha izindlu. Lingakhukhula amabholoho.
Lingagcwalisa imifula likhukhule imizi engabe iseduzane kakhulu kwemifula. Lilakho ukuna lilenkobe. Inkobe ngamatshe amancinyane lamakhudlwana aza lezulu abhidlize ngokubulala izindlu kanye lakho konke okubulalekayo nxa lilolaka.
Izilimo lazo zisala zimadabudabu kuleyo ndawo. Umoya lenkobe yizo izinto ezihamba phambili uma kulesiqhotho. Umbane lomdumo lakho kungaba khona kulelizulu.
- Umkhizo/Umfefezo
Lo ngumumo womkhathi lapha izulu elina ngamathonsi amancane kodwa emanzisa kancinyane. Umkhizo ulakho ukuba kungabi lomdumo kanye lombane. Liyabe likhifiza ngamathonsi amancane kodwa ekucineni lenza kube lobumanzi obuthile. Alifani lomhlobo olandelayo ongelabumanzi.
- Amathe Empukane
Lo ngumhlobo womkhizo olamathonsi amancinyane kakhulu afika emuntwini kumbe phansi angadali ubumanzi. Njengebizo lalo, leli lizulu elina linetha ngokukhifiza amathonsi angayi ngansi.Ayaziphephukela nje.
- Litshisela emayezini/Lilesikhudumezi
Lapha umumo womkhathi usuke ungelalo izulu kodwa kugubuzele ngamayezi alelanga elitshisela emkhathini kudaleka isikhudumezi.
Ukutshisa okunje yikho abadala abathi kuphehla izulu ngoba liyabe lifuthelana emayezini kuzwakala isikhudumezi esinzima.
Umumo womkhathi ungalandelwa, impilo ibalula ngoba sesisazi okwenzakalayo nxa lisina kumbe nxa lizakuna. Uthatha amanyathela amahle ngokwazi umumo womkhathi, asibeni lokunanzela bafundi.
