![](https://566448.40t4n.group/wp-content/uploads/site//3/murder11-1.jpg)
Thokozile Mbedzi
KUSEHLAKALO esitshiye ababalisi kunye labafundi kwesinye isikolo eGweru bephethe izibindi ngezandla, “kulombalisi” odingwa ngamapholisa kulandela ukutholakala komunye umbalisi efile endlini yakhe ngempelaviki edluleyo.
Kuvele ukuba uValentine Tamuka Zireva (27), ofundela ububalisi esikolo seHillside Teacher’s College koBulawayo nguye owacina ukubonakala lentombi yakhe, uKeener Tsanana (21), obefundisa esikolo seGuinea Fowl High School ngoMgqibelo andubana kutholakale isidumbu sakhe ngeSonto ntambama sithe daca endlini.
Kubikwa unogada wesikolo lesi, uSimbarashe Dzimba nguye owabona inkemenkeme le, wayabikela amapholisa.
Isikhulumi samapholisa esabelweni seMidlands ulnspector Emmanuel Mahoko uthe badinga uValentine Tamuka Zireva ukuze bakhulumisane laye bazwisise ngokufa kukaTsanana.
“Amapholisa alemibuzo afisa ukuba iphendulwe nguValentine Tamuka Zireva kulandela ukutholakala kwesidumbu sikaKeener Tsanana, owacina ukubonakala engena esikolo seGuinea Fowl mhlaka 24 Zibandlela bebonke.
“Isidumbu sikaTsanana besivuvukile esiphaqeni njalo silamanxeba umzimba wonke. Kutholakale njalo lempahla zikaZireva endlini,” kutsho uInsp Mahoko.
U-Insp Mahoko ucele bonke abangabe belolwazi lokuthi uZireva ungaphi babikele amapholisa aseduzane labo.
“UZireva akwaziwa ukuthi ungaphi. Sicela uzulu ongabe esazi ukuthi ungaphi abikele amapholisa asenkambeni eduzane laye kumbe amapholisa ayabe ebhoda endaweni akiyo.”