mbulelo smpofu
Bhekimpilo Tshalibe
ZILOKHE zibambe owangaphansi izakhamizi zeRiverside koBulawayo ngemva kokuba elinye inina lithengise ilaptop yomntwana, okubangele ukuthi anathe itshefu afe.
Kubikwa mhlaka 16 Mpalakazi ngo 17:30hrs, uSharazel Angel Dawson (15) loninababa lokungezwani ngemva kokuba unina ethengise ilaptop yakhe yohlobo lwe-Acer.
Kuzwakale ukuthi ongasekho emhlabeni wathukuthela kakhulu njalo wethusela unina esithi yena uzazibulala.
Kubikwa ngo1800hrs, umntwana oyintombazane oleminyaka engu- 6, umzawakhe kalo ongasekho emhlabeni walanda unina kamuyi wamtshela ukuthi ubone ongasekho emhlabeni enatha umuthi.
Kuzwakale ukuthi bahamba baya emkulwini bayakhangela lapho okuhlala khona imithi yokubulala izibungu bathola kunuka umuthi.
Unina walanda umntwana wamfica eseqhatsha ebhubhudla amagwebu.
Kuzwakale ukuthi unina wanika umntanakhe amalahle ukuthi ehlafune njengosizo lwakuqala kodwa akuzange kusasiza lutho.
Kuzwakale ukuthi unina kamuyi wadinga i-thekisi ukuthi ithwale ongasekho imgijimisele esibhedlela seMater Dei lapha afika walaliswa khona kodwa ngokuswelakala kwenhlanhla wedlula emhlabeni. Udaba lolu lwabikelwa amapholisa.
Intatheli kaMthunywa ixhumane lesikhulumi samapholisa uAssistant Inspector Nomalanga Msebele, uthe udaba olunje lufikile ezandleni zabo.
“Sikhuthaza abazali ukuthi bananzelele nxa bekhulumisana labantwana. Abantwana bakulezinsuku balomkhuba wokuphangisa ukuthatha isinqumo esibuhlungu nxa bezondile njalo bengacabanganga impumela yezenzo zabo,” kuphetha uAsst Insp Msebele.
Siphakeme .Mnindwa
