
Bhekimpilo Tshalibe
UYAPHAKAMA kwezomculo umhlabeleli we hip-hop u “D-Craze”, owayengumfundi we-Amhlophe High School, nanko phela umculo wakhe kusukela kunyanga ezayo usuzatholakala ku-Youtube.
Ekhuluma lentatheli, uDumsani Dumbura owazakala ngokuthi D- Craze uthe waqalisa ukuhlabela esesikolo ngo-2013, njalo lokhe waqalisa ukuhlabela, umculo wakhe ubungakaze ungene kuYoutube
“Mina ngihlabela imihlobo yengoma ezitshiyeneyo ezigoqela i-hip-hop kanye le-kwaito njalo ngaqalisa ukuhlabela ngo-2013 ngisesikolo, lokhe ngaqala ukuhlabela umculo wami awukaze ungene kuYoutube kungakho khathesi ngilungiselela ukuba ngenyanga ezayo ngitholakale kuYoutube,” kutsho u D-Craze.
Uthe lokhe waqalisayo ukungena kwezomculo sewakhipha ingoma ezingu-7 ama-single.
“Lokhe ngaqalisayo ukuhlabela sengakhipha ingoma ezingu-7 ezilezihloko ezithi: Izinto zakhona njalo yaphuma ngo-2019, lethi Gat it (2017), lethi Original Gat it remix (2018), Lit life (2018), Now or never (2018), Top dawg (2020) kanye lethi Memories eyaphuma ngo 2020,” kutsho u D-Craze.
Uthe emnyakeni ophelileyo wenelise ukukhipha idlalade lakhe elilesihloko esithi Ithemba.
“Ngomnyaka ophelileyo mhlaka 1 Mpalakazi ngenelise ukukhipha idlalade elilesihloko esithi Ithemba njalo lilezingoma ezingu-8 ezilezihloko ezithi 98 Freestyle, Low key, Imali yami, u’Grend, Jump like Jordan, Pull up with geez, No stress kanye lethi DTC. Ingoma lezi zizabe zitholakala ku Youtube mhlaka 28 Nhlolanja,” kutsho u D-Craze.
Uthe useke wasebenza labahlabeleli abambalwa engomeni zakhe.
“Engomeni zami sengike ngasebenza labahlabeleli abambalwa abagoqela o Reliance, A Sneezy Kanye lo Berezz.”
Uthe sowathola izicoco kabili ku-Pumula Royal Arts and Community Awards.
“Sengake ngathola izicoco kabili kuma Praca Awards kuluhlu lwe-Best Hip-Hop Artiste ngo-2021, ngaphinda njalo ngakhethwa ngaphansi kwe-Best Kwaito Artist ngo-2022. Ngenyanga ezayo ngizafaka umsebenzi wami kuYoutube ukuze wonke umuntu awuthole khonapho,” kuphetha uD –Craze.