Sinokubonga Nkala
Ophezulu Stinta
Ugwalo: Emfuleni Wezinyembezi olwalotshwa nguEzekiel S K Hleza
Kuhlelo lwezifundo esiluqhubayo sifunda okunengi ngempela ngezinto ezibuhlungu lezihlaba inhliziyo ezazisenzakala ngesikhathi sempi. Abantwana babehlubuka ubuntu babo balibale lokuthi abazali babo bayahlonitshwa. Sinanzelela amasotsha ngendlela afika ngayo emzini kaMaMoyo bemkhihlizela amazwi angachazi lokuthi wayengabazala labo bantwana. Isotsha lize litsho ukuthi lona lazalwa ngunina ozwisisayo ozala abantu hatshi ozala amatororo. Ubuntu babuhlubuka ngempela, izikhathi ezinengi sinanzelela ukuthi amantombazana kanye labomama babehlukumezeka kakhulu uhlangothi olungela mandla okuzimela lodwa.
Amantombazana amanengi alimala kakhulu ngesikhathi sempi, okwabalimaza lomcabango yikho sihlangana lezindaba ezithi uZibani bani walahlekelwa zingqondo ngesikhathi sempi. Lokhu sikubona lapho amasotsha esefike egumeni koMaMoyo ebahlukumeza ngelithi kabakhuphe amatororo njengoba uMaMoyo walizala nje. Amasotsha la akhuphela uSinqobizizwe ngaphandle kweguma lapho afika akhethiswe khona ukufa lokuphila. Pho njengoba intombazana yayivele imsulwa kungekho ngitsho lekwaziyo yayizathini pho, yayizaphendula isithi bangaphi. Yabihla intombazanyana kaMalandu kwaphela nje lamazwi ayengawatsho kwasekuyikuthi lokho abafisa ukukwenza bavele nje bakwenze bangathandabuzi. Phakathi kokwesaba kanye lokudideka kwentombazana isotsha lisuke likhangwe yibuntombi obabugcwele buphuphuma lapha kuSinqobizizwe. UMlimu wayedalile phela. Lasondela isotsha lamanga, kambe yikwanga kweqiniso na lokhu isitha sikuthwalele umbhobho. Kulapha-ke bantu abesifazana abahlutshulwa isifazana basala lesilonda esingeke sipholiswe muntu. Isotsha lazithaphuzela enganeni kaMalandu eyayilokhu igogose ubuntombi bayo. Kambe wayezabuya akuthole ngaphi ukuthula kwenhliziyo? Ukudlwengulwa kwabesintwana kwakubhahile kakhulu, kuyindaba eyayingela nkamba lapho umuntu ayengabika khona. Umuntu wayegogosa lobo buhlungu kube yingxenye yempilo. UMaMoyo laye udlwengulwa okuhloniphisayo, isimo esihlukumeza abantwana kakhulu, pho amandla okuphila bayabe sebawathatha ngaphi nxa kunje?
Online Reporter
